29.4 C
Tura
spot_img

Game ge•e cha•giparang baksa Agri Minister agangrikna ku•rachaka, Farm laws-ko name nichengchina didia

Must read

New Delhi, Dec 10: Farmers Law-ko ra•gatani bidingo game ge•e cha•enggipa manderang a•song gimikon jingjengatanirangko daktokengani gimin ia neng•nikaniko namatna gita sorkari, game ge•e cha•enggipa manderang baksa agangrikna kusi ong•enga ine Bristibar salo, Union Agriculture Minister Narendra Tomar parakataha.

Iani bidingo kobor ra•timgiparang baksa agangrikengon, September jao Parliament-o pass gital niamrangara game ge•e cha•enggipa manderangna namgni ong•gen ine Tomar parakataha.

Ia Farmers Law-o sorkarini on•chapatna miksongenggipa niamrangko name nichengenba sorkari baksa agangrikna tarikko tik ka•china gitaba Agriculture Minister, game ge•e cha•giparangko didiataha.

“Sorkari game ge•e cha•giparang baksa agangrikna tarimanaha,” ine Tomar aganaha.
Ia gital niamrangara APMC Act ba minimum support price (MSP)-na maming nangchakeani dongjawa ineba ua game ge•e cha•giparangna ku•rachakaniko on•ataha.

“Chinga proposal-ko game ge•e cha•giparangna on•atahachim indiba uamang niamrangko ra•galpilchinasa nangnikskaenga. Uni gimin chinga uamangni jegalenggipa niamrangni bidingo game ge•e cha•giparang baksa agangrikna nangnikenga. Ia niamrangara APMC ba MSP-na nangchakeani dongja aro iani bidingo chinga game ge•e cha•giparangna agan-talate on•na jotton ka•ahachim,” ine Tomar aganaha.

Mandi system-oniko jakgitel ong•atna aro game ge•e cha•giparang bazar antirangona agreba gipin biaprango an•tangtangni game ge•e man•gipa bosturangko palna sim•na man•na gitasa ia niamko ma•mong sorkari pass ka•aha ineba Union Agriculture Minister parakataha.

“Game ge•e cha•gipa manderangni a•arangko karkana chalaigiparang ra•sekgnok inesa uamang ma•sisrettokenga. Skangonin Gujarat, Maharashtra, Haryana, Punjab, Karnataka aro gipin a•dokrangoba contract-chi gama ge•anirangko dakenga indiba iandake game ge•e cha•giparangni a•arangko ra•sekanide dongkuja,” ine Tomar aganaha.

Indake ong•engon, a•songo game ge•e cha•enggipa manderangna pangnan Modi sorkari kamko ka•gen ine sakgipin Union Minister Piyush Goyal parakatskaaha.

spot_img

More articles

spot_img
-->

Latest article