Shillong, Nov 09: 2021-2022 bilsi scholarship-rangko a·dok sorkarini da·ona kingkingba college-o poraitokenggipa chatro-chatrangna on·kujaengani gimin, Hynñiewtrep Youths Council (HYC) Education cell, Bristibar salo Shillong songjinmao tom·tom re·jomaniko ong·atna tik ka·aniko Butbaro parakangaha.
Koborna u·iatani gitade, re·jomaniko Madan Iewrynghep Firebrigade-oni attamchibara 1 bajioni re·chakatbae Shillong, Additional Secretariat mikkango tom·dake jegalaniko dakanggen aro iano a·jani ge 50 institution-rangoni sak 700 na baten chatro-chatrirang bakko ra·angna gita organisation ka·dongsoenga.
Iani bidingo Shillong Press Club-o koborni manderangna agananganio, education secretary Enlang Sawian, scholarship-ko on·china gita a·dok sorkari baksa agangrikanirango chu·sokgipa ong·jahani gimin organisation iandakgipa ja·kuko de·na tik ka·aha ine parakan baksa, “scholarship-ni tangkarangara kangal-cholgri ong·e poraienggipa chatrorangna namen gamchata aro ia tangkarangan 50 percent-de uamangni poraianio dakchakanikoba on·enga indiba a·dok sorkari chingni dabianiko knachakna gisiko nangja gita nika ineba ua aganangkuaha.
Batanggimin chang re·jomanio golmalrang ong·anichi tom·daknasienggipa biapo 144 CrPC-ni niamko ra·gatgimin donganiko u·ioba, uamangni re·jomaniara golmalrangko ra·banagipa ong·jawa ine HYC education cell-ni manderang ka·donge agananga baksana, uamangni re·jomaniara darangni namgninasa ong·engani gimino somoi soko uamang jedakgipa champenganikoba mikkangchakna gita taria ineba Sawian agandapataha.
