29.4 C
Tura
spot_img

2023 bilsini SSLC porikkao Tura-ni chatro chatrirang teng·sua, Top 20-ni skanggipa biapko Sherwood chea

Must read

Shillong, May 26: Ia 2023 bilsini SSLC porikkao Tura-o donggipa Sherwood School, Top 20-ni skanggipa biapko man·e Garo Hills gimiknan mikkim rasongko ra·baaha. Sherwood School-ni Samridhya Das, 572 mark-rangko man·e, Top 20-ni skanggipa biapko man·aha.

Samridhya Das

SSLC porikkani result-rangko Sukrobar salo, Meghalaya Board of School Education (MBOSE) parakataha aro ia bilsio Tura-oni adita sak chatro chatrirangba, Top 20-o biming nakatrikpaaha.

Top 20-ni gnigipa biapko, Shillong-o donggipa St Margaret’s Higher Secondary School-ni Jyotipriya Bhattacharjee, 570 mark-rangchi man·aha aro gittamgipa biapko St Margaret’s HS School-ni Tanushri Acharjee, Tura Sherwood School-ni Ritam Deep Chowdhury aro Tura St Xavier’s Secondary School-ni Salrime M Sangma sakgittaman 564 mark-rangko man·e sualgrikskaaha.

Ritam Deep Chowdhury

Tura Aeroville HS School-ni Ronggrik B Sangma, 562 mark-rangko man·e Top 20-ni brigipa biapko man·skaaha aro Shillong All Saints Diocesan HS School-ni Kennedy Dondor Richmond Dunai, 560 mark-rangko man·e bongagipa biapko man·rikskaaha.

Sanskrita Karmakar

Shillong St Dominic Savio’s HS School-ni Felisha Kurkalang aro Tura Sherwood School-ni Sanskrita Karmakar sakgnian 559 mark-rangko man·e, dokgipa biapko sualgrike ra·skaaha.
Shillong St Anthony’s HS School-ni Ansh Gurung, 557 mark-rangko man·e snigipa biapko, Nongstoin-o donggipa Sibsingh Memorial Govt HS School-ni Springfield Sniatang, 556 mark-rangko man·e chetgipa biapko aro Shillong St Mary’s HS School-ni Sanida Emi Pakma, 555 mark-rangko man·e skugipa biapko man·rikskaaha.

Top 20-ni 10-gipa biapkoba chatri sakgittam, 554 mark-rangko man·e sualgrikaha aro uamangara, Shillong Christian Academy-ni Sandara Marpna, Shillong Synod HS School-ni Isabella Mawlong aro private institution-oni Pallavi Phenang ong·a.

Ia bilsio SSLC porikkani Top 20-o a·dokni dingtang dingtang skulrangba biaprangko man·rikpaaha.

Re·anggipa 2022 bilsini SSLC porikkaode pass ka·ani percentage 56.96 percent ong·achim indiba ia changode pass ka·ani percentage 51.93 percent-san ong·skaaiahani gimin adita tang·onaniko nikna man·aha.

Ia bilsini SSLC porikkako a·dok gimiko donggipa dam 656 skulrangoni gimik sak 51,280 chatro chatrirang seahachim aro ianoni sak 26,629 chatro chatrirang pass ka·na man·aha.

East Khasi Hills a·jao pass ka·ani percentage 73.87 percent ong·e a·dok gimiko bang·bate pass ka·gipa district ba a·ja ong·aha aro South West Garo Hills a·jao pass ka·ani percentage 26.73 percent ong·e a·dok gimiko komibatgipa ong·skaaha.

spot_img

More articles

spot_img
-->

Latest article