Shillong, May 22: Re·baenggipa 2023 bilsini Meghalaya Legislative Assembly election-o da·o ong·enggipa MLA-rangoni sak 16 ba sak 17-mangni gitade United Democratic Party (UDP)-oni susana nangniktokenga ine UDP-ni general secretary Dr Jemino Mawthoh parakataha.
Sonibar salo, East Jaintia Hills UDP youth wing-ni gital office bearer-rangna dingtangmancha Sohkymphor songo, jinma tom·aniko ong·atanio UDP-ni general secretary, ia kattarangko parakataha.
Ia tom·anio UDP-ni general secretary baksana UDP-ni president aro Assembly-ni Speaker Metbah Lyngdoh, Khliehriat-ni UDP MLA Kyrmen Shylla, Ranikor-ni UDP MLA Pius Marwein aro gipin dilgiparangba dongpae bakko ra·angaha.
Mawthoh-ni parakatani gitade, da·o ong·enggipa MLA-rangoni sak 16 ba sak 17-mangni gitade UDP-oni susana nangniktokengani gimin skang changrangona bate ia chango UDP-ba cholrang nambatenga.
Ia tom·anio UDP-ni president aro Assembly-ni Speaker Metbah Lyngdoh-ba UDP-ni member-rangna aganprakengon, UDP dolara ku·cholsan ong·gipa aro a·doko songdongenggipa manderangni namgnina kamko ka·enggipa dol ong·a ine da·o manderang ma·sitokengahani gimin 2023 bilsini Assembly election-ode manderang, bilsi 50-na komigipa manderangonikosa seokgnok aro seoka man·gipa MLA-rang bang·batan UDP-onisa ong·gnok ine an·tangni ka·dongchakenganiko parakataha.
