Shillong, May 25: West Khasi Hills a·jani dingtang dingtang NGO-rang jekai, All Khasi Hills A·chik Federation (AKHAF), Hynnewtrep National Youth Front (HNYF) aro Hynnewtrep Youth Council (HYC) dolrang nangrime, Bristibar salo Borsora LCS aro Cherragao export port-ona re·ange nirokeaniko dakangaha.

Iani bidingo koborna seachi janapatani gita, NGO-rangni tanggitik ong·e a·damona re·ange nirokeanio bang·a dingtang dingtang niamni a·palogipa ong·gija kamrangko nikbana man·an baksa rama-jal·langrangni namsranggijanikoba nikjolbaaaha ine parakataha.

Rama-sorokrangni namgijani gimin janapatengon, ian nangana badepile jrima gnang gari-gorarangni re·enganichi manderangni jakkalenggipa ramani obostarang namen namjabataha ine NGO-rang parakatan baksana, a·jani ning·o ong·enggipa pilak ong·gija kamrango department-oni manderangan jak donga aro ua jolo songdonggipa ramram mande aro kangal cholgrirangni man·gniko uamangan ra·sekenga ineba NGO-rang matnangataha.

Ia mamlarangni bidingo, nanga gita ja·kurangko de·atchina aro nirokatchina gita jolni NGO-rang a·jani bil man·giparangna sedoaniko dakangaha.