Shillong, Oct 21: Upper Shillong-o donggipa 7th Mile-o dokkan dake cha•enggipa joltangni manderangoniko No Objection Certificate (NOC)-rangko bi•engani gimin Federation of Khasi Jaintia & Garo People (FKJGP) Upper Shillong Circle aro Khasi Students Union (KSU) Upper Shillong unit, sorkariko jegalataha.

7th Mile-o donggipa Airforce headquarter sambao, ramarango ma•manti bosturangko pale cha•enggipa joltangni manderang, chonchongipa dokkanrangko rikahani gimin adita salrangna skangsan Airforce headquarter-ni official-rang, Mylliem C&RD Block-ni official-rango badi ka•ahachim ine nikna man•a.

Indake ong•engon, ia biaprango skangonin, ia jolni manderang bading chiwale aro dokkanrangko dake cha•enga aro ia biapo dokkan dake cha•enggipa manderangko PWD ba Block-ni gita a•rikgalna jotton ka•genchimode uamang rakgipa ja•kurangko de•angskagen ine dolgni NGO-rang mikrakataniko on•angaha.