Shillong, Oct 11: East Khasi, Shillong-oni saksa abri maldogipa Tiklu Jyrwa-ni manggisiko Mongolbar salo Lumparing-o donggipa Presbyterian Church-ni gopramo gopaha.

Bilsi 35 ong·gipa Jyrwa sagiara, re·anggipa October 4 tariko Uttarkashi-o donggipa Draupadi Ka Danda-o suurirang rurongdapako man·e tanggitik sianggipa sak 26 oni saksa ong·paachim. Jyrwa-ara, Meghalaya Sport Climbing and Mountaineering Association (MeSCMA)ni saksa memborba ong·achim.

Sianggipa Tiklu Jyrwa, Uttarkashi-o Nehru Institute of Mountaineering (NIM)ni ong·atgipa Advance Mountaineering Course-o bakko ra·epagipa saksa ong·achim aro uni a·bri maldona skie ra·anirango Directorate of Sports and Youth Affairs-chi MeSCMA-ni gita dakchakako man·aha.

Suuri rurongdape a·sel-obostako chagrongna skang, ua aro unbaksa sak 40 gipinrang mija Oct 4 tariko Uttarakhand-ni Mt Draupadi Ka Danda-II a·bri ku·chotona maldoangani ja·man pil·batokengachim.