Shillong, Dec 09: Meghalaya a·dokni dakchakgipa skotong minister Pa Prestone Tynsong, Sukrobar salo, Mawphlang songo Executive Engineer, PWD (Roads), Office-ni Mawphlang Division-ko kulie on·angaha.
Mawphlang Division-ko kulie on·anganio, Pa Prestone Tynsong, jinmana aganprakangengon, iako kulie on·aniara ru·uta bilsirangoni a·jani manderangni nikjumanganiko a·dok sorkarini be·en pil·atani ong·a ine aganenba, Division-ko kulie on·anian da·o donggipa sub division-ko ra·doatenga ong·ja indiba gital division-ko songanisan ong·aia aro sub division-ba skang gitan apsandaken kamko ka·angkuaigen ine dakchakgipa skotong minister parakataha.
Pa Tynsong-ni u·iatangkuani gita, sorkarini pilak kamrangko manderangona sepangbatatna gita miksongenba iani bidingo ning·tue chanchirimani ja·man Dadenggre, Kharkutta, Mawshynrut aro Mawphlang songrangona ge·bri gital PWD Division-rangko kullie on·na gita sorkari tik ka·aha ine parakatan baksana, Shillong songjinmao gari-gorarangni sket-changket dakanirangko nambate nirokatna gita Shillong PWD-ni South Divison-ko Pynursla-china jitangnasienga ine Pa Tynsong u·iatangenba, sorkarini office-rangko a·dokni gipin biaprangchina jitatani kamrangba da·o ong·enga ineba u·iatjolaha.
Ia PWD office, Mawphlang Division-ko kulie on·angani somoio, MLA, Eugeneson Lyngdoh, MLA, Samlin Malngiang, MDC, H Lamphrang Blah, MDC, Pa Sherbor Mawlong, PWD (Roads)-ni Chief Engineer, Pa K K Mawa, Eastern Circle PWD, (Roads)ni Superintending Engineer, S Kyndiah, Shillong South Division-ni PWD (Roads)-ni Executive Engineer, W Rilang Lyngdoh, Hima Mawphlang-ni manderang aro gipinrang bakko ra·angtokaha.
