Shillong, May 18: Shillong-ni District Jail-o donenggipa pilak koidirangko ru·utgijan Mawdiangdiang, New Shillong Township-o gital rikatenggipa Shillong Jail-ona rimjitbagnok ine a·dokni dakchakgipa skotong minister aro Home (Jail)-ko jako ra·e nirokenggipa, Pa Sniawbhlang Dhar, ua gital rikenggipa pattok nokko Bristibar salo niemitingo u·iatangaha.
Shillong-ni gital pattok nokko rikani kamrang da·oba matchotsrangkuja aro jensomoio chu·gimik kamrang matchotahaon Jail Road-o donggipa District Jail-ko gital nokona jitatbagnok ine Pa Dhar u·iatangenba, 25 acre-mangni gita ong·gipa Urban department-ni a·ako sandie man·aha aro sak 1000 mang pattokoni koidirangko chipnapna man·e gital Shillong Jail-ko rikna gita Urban department-ni a·ako Jail department jako ra·skagnok ineba dakchakgipa skotong minister u·iataha.
Apchangketgipa Shillong songjinmani biapko bangbangatna gita, songjinmani a·palona district jail-ko jitatanganian nambatgipa chol ong·enga ineba Home minister agandapataha.
Gital rikenggipa songjinmani pattok nokko niea baksana, a·dokni dakchakgipa skotong minister aro transport aro urban affairs-koba jako ra·e nirokjolenggipa Pa Sniawbhlang Dhar, Khyndai Lad, chong·motan Police Bazar-o gital rikenggipa project-rangkoba Jowai constituency-ni MLA Pa Wailadmiki Shylla aro Municipal-ni CEO, contractor-rang aro gipinrangni dongpaanio apsandake niangjolaha.
