Jowai, Nov 29: East Jaintia Hills a·jani Tuber Chohchrieh-o donggipa napchakram biapo rimchaksoani cholgugako rikatgipa Welcome Arch-ko Social Welfare Minister Pa Kyrmen Shylla-ni jakchi Sombar salo Arch sambao chonbee tom·aniko ong·atgipao oprake on·angaha. Arch-ko oprake on·angani somoio, Mawphlang-ni MLA Eugeneson Lyngdoh, East Jaintia Hills a·jani DC, SS Syiemlieh, district-ni SP, JS Dhanoa, songni nokma ba Waheh Chnong, Khroo Ksoo, Star Cement Ltd-ni Director, Emlangku Lamare-maangba dongpatokaha. A·palchini re·bagipa manderangko rimchaksona gita Star Cement, ia Welcome Arch-ko PPP Mode-ni ning·o chu·gimik gong lak 30 tangka-paisarangko koros ka·e rikatahachim indiba COVID-19 sajinmani tanggitik sokbaanichi rikataniko bilsi 3-rangna ru·utataha.

Indake ong·engon, iandakgipa ja·kuko de·e kamko ka·anina tom·ao bakko ra·e agananggiparang, Star Cement company-ko dingtangmancha mittelpilangaha.Unomiting, tom·ao mongsonggipa ong·e sokgipa minister Pa Kyrmen Shylla-ni jinmana aganangengon, ua district-na, mongsongbate nika-niani gnanggipa biap ba tourist spot-rango bang·bata CRS project-rangko on·china gita company-ko mol·molanga baksana, East Jaintia Hills a·ja gita Assam a·dokchini Meghalaya-ona napbagipa biapo ia apsandakgipa rimchaksoani cholgugako rikattaichinaba Company-ko mol·molangjolaha.