Shillong, Aug 4: A·dokni health portfolio-ko jako ra·chakataoni skanggipa chang ong·e aganengon, Meghalaya-ni dakchakgipa skotong minister Pa Prestone Tynsong, a·doko Covid sabisiko warachakanio skang gitan apsan miksonganikon ja·rike kamko ka·angkuaigen ine aganangaha.
Pa Tynsong, indakeba a·doko songdongenggipa manderangko maming nanga gri skatang noktangtangoni ong·katjachina mol·molanga baksa, nangchongmotani gimin ong·katoba mask-rangko ganchina aro dongimin niamrangko manitokchinaba ua mol·molangjolaha.
A·dokni health portfolio-ko ba sana-banani a·bao nangchapgipa pilak kamko jako ra·chakatani ja·man mikkangchina ua maiko skanggipao done kam ka·anggen iani gimin ja·mano u·iatgen ineba minister agandapataha.
Indake ong·engon, a·doko Covid sabisiko man·anio maming dingtanganikon nikna man·kujaenga. Butbar salo, sabisiko man·e donggipa gimikara sak 521 mang ong·a aro sak 7 gipinrangba janggitangko gimaataha.
A·doko da·o sabisiko man·e dongenggipa gimikara sak 5,516-mang ong·a aro sak 60,375 mangni gita saoni nampiltokaha. Covid sabisio nangchape a·doko sianggipa gimikara sak 1,125-mang gapangaha.
Indake, a·dok gimikoniko ia sajinmako komiatna gita jotton ka·eangni gisepon, manderango ia sabisini tikako su·anioba health department minggipin dakgipa ra·bianirangko chagrongna gita nangskaenga. Da·ona, gimik-gimang sak 9,05,672-mangni gita skanggipa tikako su·e ra·angtokaha aro gnigipakode sak 2,07,135-mangni gitasan su·tokkuenga. Tikako matchote su·giparangara da·alona gimik-gimang sak 11,12807 mang gapaha.
