Shillong, Dec 22: A·gilsak gimikchi Covid sajinmani giproroani tang·doengkuoba, Meghalaya a·doko ia sabisiko man·giparang da·odipetde 0.1 ba 0.2 percent-san ong·aienga ine koborna parakataha.
A·doko covid sajinmani obostarangko Bristibar salo nipilanganio, a·dokni skotong minister Pa Conrad Sangma, Meghalaya a·doko manderangni ia sabisiko man·anirang da·odipet komienga aro manderang iana kenna gita nangja ine aganangaha.
Covid-na porikka ka·anirangko bang·en dakatengkua ine u·iatengon, manderang ia sabisina jajrengna gita nangjawa maina sorkari ia pilak obostakon nirokatenga ineba Pa Sangma parakataha.
Indake ong·engon, maniani somoirang ong·engani gimino manderangko an·tangtangna simsake mask-rangko ganchinaba skotong minsiter sakantikon didiatjolaha.
