Shillong, Oct 13: A·dok sorkari aro Umiam Lake-ni chiko rongtalatpilani gisepo batanggimin 2019 bilsio PIL-ko on·anggipao Meghalaya High Court-ni ge·etaniko on·anio pangchake a·doko donggipa chiring-chibisik aro chibimarangni rongtalgija moilarang ong·aniko ong·bewalona ra·baatpilna aro uandakgiprangna dingtangmancha naljokanirangko on·na gita pilak dakna nanggni kamrangko niroke ka·china bil on·e ia bilsini June 23 tariko Meghalaya sorkarini songanggipa expert committee-ni gnigipa changna tom·e chanchirimaniko Bristibar salo Shillong, Sylvan House-o ong·atangaha.
Tom·e chanchirimangani bidingo committee-ni chairman Naba Bhattacharjee u·iatani gita, expert committee-ni a·jatangtangni deputy commissioner-rangna watatgipa format-ni gimin u·igipa bang·gija district-rangoniko man·sogipa report-rangko salni tom·anio ra·chimongaha ine talataniko on·aha.
“Expert committee-ni skanggipa tom·ango, a·jatangtango donggipa chiringrang, chibimarangni rongtalgija ong·aniko, moila ong·anirangko ma·sie ra·ani gimin talatanirangko on·e pilak district-ni deputy commissioner-rangna format-rangko watatenba report-rangko on·china ge·etaniko on·angahachim. Da·alni chanchirimanide, mitam district-rangoniko man·sogipa report-rangni gimin ma·sie ra·anirangko aro nipiltaianikosan dakangaha. Unbaksana, format-ni gimin u·ikugijagipa bangki dam 3 ba dam 4 district-rangna talatanikoba on·angjolaha,” in chairman u·iataha.
Indake ong·engon, expert committee, bangki district-rangkoba sal 10-ni gisepon report-rangko sokatchina gita somoiko on·ataha, indake, committee jensomoio ua chu·gimik report-rangko man·soahaon pilak dakna nangarangko matchote tarienba chiring, chibimarangni moila aro rongtalgija ong·anirangko apsan ong·bewalona ra·bapilani gimin nangchongmotgipa agan-ku·pattianirangko on·anggen.
Na·tok jilgipa pokkrirangko changale, a·dokoni dam ritcharang baten chibimarang, ia committee-ni nirokatani jakon ong·gen ine janapatengon, moila ong·gipa chiring, chibimarangko rongtalatpilani kamo action plan-ko tarie nanggipa ja·ku de·anirangko dakchina committee-na bilko on·anggenchimoba, a·dokni damsni chibimarangoni Umkhrah,Umshyrpi, Kyrhokhla, Nonbah, Umtrew, Lukha aro Myntdu, uarangkode dingtang committee-sa jako ra·e nirokatskaenga. Iarangna agreba, dam 53 chibolrangko State Wetland authority-sa jako ra·e nirokatenga ine Bhattarcharjee u·iatangaha.
