Shillong, Jan 26: India a·songni chang 73-gipa Republic Day-ko Shillong songjinmao manianio Meghalaya a·dokni Chief Minister Conrad K Sangma, mongsonggipa sokgipa ong·e a·songni nisanko badale on·angaha aro ia salko manianio ua jinmana aganprakangengon, an·tangtangni chu·sokatna man·gipa kamrango chu·ongnike dongaigija nambata kamrangko chu·sokatangkuna tikkelchina aro a·songna aro a·gilsak gimiknaba dakmesokgiparang ong·china gita a·doko songdongenggipa manderangko didiangaha.
“Dingtang dingtang ra·bianirang donggenchimoba maikai an·ching Meghalaya a·doko sorkariko rikanio teng·suatna, songsalni gita teng·suatna, a·songni gipin bakrangna aro a·gilsak gimiknaba teng·suani gnang dakmesokgiparang ong·na man·gen. Meghalaya a·dok bang·en chu·sokatna man·kugen. An·ching an·chingo donggiparangchi chu·ongnike dongaijana maina ian an·chingni asol ra·biani ong·enga,” ine Sangma aganaha.
2018 bilsio sorkariko rikchengani somoio uni sorkari mai dakgipa neng·nikanirangko aro ra·bianirangko chagrongna nangahachim, uarangni gimin janapangengon, “2018 bilsio chingni sorkariko rikchengani somoio chinga bang·a ra·bianirangko chagrongna nangahachim. Ua somoirango bobil dake chakatani, tom·tomanirangko rakkiani aro uandakgipa dingtang dingtang neng·nikanirangko chagrongna nangaha. Ua sal somoirango ma·giparangba maming dakchakani gri detangtangko an·pakkuengachim. Ma·giparangoni 50 percent-de an·tangtangsa noktangtangon an·paktokengachim. Bi·sarangoni 40 percent-de maming tikarangko man·tokkujaengachim aro ua somoirango self help group (SHG)-rango bak ong·enggipa manderangba sak 30,000-an ong·kujachim. PMGSY-ni kamrang ua somoio 2001 bilsionin matchotkugijagiparang dongkuengachim,” ine Chief Minister aganenba, uni sorkari ia ra·bianirangkon didiani gita ra·skaenba dingtanganiko ra·bana kam ka·skaaha ine parakataha.
Ia sorkari pangnan bading chiwalgiparangkosa mikkango done kamko ka·a aro pangnan a·doko songdongenggipa manderangni namgnini gimin chanchiesa ja·kuko de·a ineba Chief Minister parakataha.
Me·chikrangna aro bi·sarangna ia sorkarini a·bachengatgipa kamrangni gimin janapangengon, “An·chingni a·doko pangnan sak 28,000-na baten an·o donggipa me·chikrang dongronga indiba chinga uamang sakprakkon name ma·sigiparang ong·a ine anga na·simangna u·iatna kusi ong·a. Uamangko badia sub-centre-o, badia PHC-o, badia doctor-rang aro badia ASHA-rang nirokenga, chinga na·simangna talen aganna man·aigen. Ia an·o donggipa me·chikrangoni 10-15 percent-ni gitade kenchakna nanggiparang ong·a aro chinga uamangni bimingrangko ma·sia aro uamangna doctor-rang, ASHA-rang name nirokchina gita cholrangko on·enga. Iandakgipa kamrangni a·selan da·alo me·chikrangni hospital-rango aro health centre-rango an·pakani tang·doangaha,” ine Chief Minister parakataha.
Tika su·anirangba 2018 bilsio 57 percent ong·aoni da·o 91 percent-ona tang·doangaha ineba ua aganaha.
Sorkarini ra·gatgipa MOTHER program-ni gimin janapangskaengon, da·o dipet ia program-ni namgnirangko man·enggipa manderang lak 1.13 gapaha aro health centre-rango an·pakaniba 2016 bilsio 51% ong·aoni 2020 bilsio 83%-ona tang·doangaha ine Chief Minister parakataha.
