Guwahati, June 24: Baditaba sak manderangko so·otanio, gari cha·uanio, ra·seke ra·anio aro pekatgipa samrangko niam gri badinganio chasong-gnirangna kingking Assam police-ko sko sa·dikatbaenggipa mongsongbatgipa denggu, Bubu Konwar minggipako Upper Assam-ni Sivasagar-o Butbar salo policerang goe so·otaha.
Ia obostani bidingo Sivasagar-ni SP Rakesh Raushan-ni aganani gita, Assam aro Nagaland-ni sima jolni distict headquarters-oni km 29 mang chel·gipa Gelakey-o Konwar-ni silchidarerangko niam gri badingenganiko kobor man·sringe tanggitik chadrapaniko dakataha. Uko sakgipin mande baksa pring 6.45 bajimango scooty-o re·baako police-ni mikkangchakon police-rangko slai goaha aro police-ba an·tangtangko naljokatna gochakaha. Gogrikani ja·man Konwar, saknaaha indiba sakgipin kate jokangaha, ineba Raushan parakataha.
Police, bakan Konwar-ko sambajolni hospital-ona ra·angahachim indiba ra·bamitingon siaha ine parakaha. Indake ong·engon, kate jokgipa sakgipinkoba police-rang sandiatna gita a·bachengaha, indake a·sel ong·gipa biaponiko Brown Sugar chipe ra·bitgipa ge 10 timarangko aro ge·sa pistolkoba man·aha, ine koborna parakataha.
Police record-ni gitade, batanggimin bilsi 2008 jolo gopretgipa crude bomb-ko tarimitingo an·tangni jaksi ge·gittamko gimaatani gimin Anguli Kanta ineba mingklaka man·gipa bilsi 45-ong·gipa Konwar-ara Sivasagar, Amguri-o atchigipa ong·a aro uni pagipara Nagaland-o police ka·e uaba unon dal·ahachim.
Tikka ra·e politician-rangna mande so·ottime on·ronga ine jikgipani a·kangengon, Konwar-ko saksa niksenggipa doctor Mridul Baruah, Congress dolni dilgipa Hemanta Baruah, saksa badinggipa KL Ginoria-maangko batanggimin 2012 bilsi jolo so·otanio aro 2014 bilsi jolo saksa school headmaster DN Gogoi-ko so·otanio dosi on·ako man·e Assam-o namen mingsingangaha.
Konwar, an·tangba iana skang sak 42 manderangko so·otaha ine television channel-rango ku·rachakangaha, indake ong·oba iani gimin sandidape man·ani maming sakki dongchipjaha.
Re·anggipa March jao, Brown Sugar baksa Jorhat-ni police-rang Konwar-ko Sivasagar-oniko rim·ahacchim, indiba ua jamin man·e jokpilaha.
