Shillong, Feb 25: Da•al Bristibar salni bako Lok Sabha-ni Speaker Om Birla, Meghalaya a•dokona re•baaha aro Meghalaya Legislative Assembly-o aganprakengon, a•dok sorkari aro autonomous district council-rangko nangrime kam ka•china ku•pattianiko on•angaha.
Meghalaya a•doko namroro silroroanichi a•song gimikna dakmesokgipa ong•na man•gen ineba Birla aganaha.
“A•doko songdongenggipa manderangni neng•nikanirangko namatna gita a•dok sorkari aro autonomous council-rang, ku•cholsan ong•e cholko sandina nanga,” ine ua aganaha.
India a•songara jakgitele janggi tangna man•gipa a•song ong•e pilak neng•nikani aro ra•bianirangko namatna cholrang donggipa ong•a ineba Lok Sabha-ni Speaker parakataha.
“An•chinga manderangni seokako man•giparang ong•e Meghalaya a•dokni aro a•song gimikni namroro silroroanina gital a•bachenganiko ra•bana gita an•tangtangko chu•gimik on•kangna nanga,” ine Birla aganaha.
Meghalaya a•dokni gital Assembly nokko rikengahani gimin an•tangni kusi ong•chakaniko parakatengon, “Meghalaya a•doko bilsi 15-na sengani ja•man da•o Meghalaya Legislative Assembly-ni gital nokko man•gnok. Ia nokna bimangko tariani namen nitobeaha aro anga bebera•a na•simangni gital Legislative Assembly nokan, na•simangni nitobegipa a•dokni nitobegipa daka rikaniko mesokgen,” ine Birla parakataha.
Assembly-ni membor-rangna pilak nanga dakchakanirangko on•na man•na gita Assembly-o modern research wing-ko kulichina gitaba Lok Sabha-ni Speaker didiangaha.
“Parliament-ni Budget Session-ko ong•atanio chinga ‘PRISM’ minggipa gital kolko Parliament-o a•bachengaha aro ia kolchian MP-rangna Parliamentary Research & Information Support-ko on•enga. Meghalaya Assembly-oba Research Wing-ko kulina gita chinga pilak nanga dakchakanirangko on•gen,” ine Birla ku•rachakaniko on•angaha.
Parliament-ko chalaianio e-Parliament aro e-Office gita dakgipa ICT kolrangko jakkalanichi Parliament-ni membor-rangko uamangni daitorangko chu•sokatanio namen dakchakaha ine talatangengon, e-notice, Members Portal aro uandakgipa internet-ni kolrangko jakkalanichi Assembly-ni kamrangko nambate ka•angna man•gen ine Birla, an•tangni ka•dongchakenganiko parakataha.
Parliament-rango jakkalenggipa Question Hour, ‘Zero Hour’ aro uandakgipa kolrangko jakkalanichi manderangni neng•nikanirangko namatna man•gen ineba Lok Sabha-ni Speaker aganaha.
Shillong songjinmani Mawdiangdiang-o rikenggipa Meghalaya Legislative Assembly-ni gital nokko da•al salni bako Lok Sabha-ni Speaker Om Birla, Meghalaya a•dokni Chief Minister Conrad K Sangma, Meghalaya Legislative Assembly-ni Speaker Metbah Lyngdoh aro gipin dilgiparang baksa niangjolaha.
Meghalaya a•dokni gital Assembly nokko ia bilsini gisepon matchotna ka•dongengachim.
