Guwahati, May 10: Batanggimin bilsichetna Prime Minister Narendra Modi-ni a•songko re•dilanio, Assam a•doko ra•gatgipa Armed Forces (Special Powers) Act (AFSPA)-ko mitam biaprangode ra•galataha ine Mongolbar salo, Union Home Minister Amit Shah parakataha.
Mongolbar salo, President-ni Colour Award-ko Assam police-na on•angani ja•man Union Home Minister Amit Shah, jinmana aganprakangengon, “Assam a•doko bobil dake chakatgipa dolrangko warachakna gita 1990 bilsionin AFSPA-ko ra•gatahachim indiba bilsichetna PM Narendra Modi-ni a•songko chalaianio Assam-ni bang•bata biaprangon AFSPA-ko ra•galataha. Dam 23 a•jarangoni pilak a•jarangon AFSPA-ko tong•sakode ra•galataha. Chinga bebera•a bakan Assam a•doko AFSPA-ko chu•gimik ra•galatgnok,” ine parakataha.
Bilsi 25-na kamko ka•anio nambee dakmesoka gnang kamrangko ka•ahani gimin Mongolbar salo, President-ni Colour Award-ko Amit Shah-ni jakchi Assam Police-na Guwahati songjinmao on•angahachim.
Bobil dolrangko warachakanio, ong•gija dakgipa kamrangko champenganio, niam retirangko rakkianio aro pilak manderangnan chel•chakanirangko on•anio nambee kamrangko ka•ahani gimin Assam police-ba ia mingnamgipa award-ko man•giparangoni chikkinggipa police dol ong•aha ineba Union Home Minister parakataha.
A•doko tom•tomaniko ra•bana gita Assam police rakbee kamrangko ka•enga ine janapatengon, Assam a•doko bilsi 10 batpile bobil dake chakatanirangko nikna man•ahaoba, Assam police-rangni rakbee kamrangko ka•anichi da•o tom•tomaniko ra•bapilna man•aha ine Shah, Assam police-ko mittelpile aganangaha.
