Itanagar, Nov 18: Bristibar pringo Indian Air Force (IAF)-ni helicopter bolsa Arunachal Pradesh a·dokni Rochham helipad-o ga·akona gnang onchongna gita nangaha.

Koborko on·ani gitade, Bristibar pringo ia helicopter, Anjaw district-ni Hayuliang-oni ia apsan a·jani ning·o donggipa Rochham-ona Army-rangna nanga bosturangko ra·angengachim.Ia helicopter-ko Squadron leader Reddy aro Kartik Patni bildilangengachim aro ia helicopter-o mande sakbonga dongachim.Ia helicopter-ni ga·ake onchonganio ia helicopter-ni engineer, adita saknaanirangko man·aha indiba helicopter-ni bangka chu·gimik nosto ka·ako man·aha.

Gipin officer-rang aro helicopter-o dongpagipa pilakan maming saknaanirangko man·tokjaha.

Ia helicopter-ni a·sel ong·ani ja·man Rochham post-ni ITBP sipairang, dakchakanirangko on·eaha.