Shillong, Jan 27: Bangladesh a•songni manderangko mikkang nitee biap on•gipa ine Sukrobar salo, AITC-ni dilgipa Mamata Banerjee-ko BJP-ni state president Ernest Mawrie matnangatenba, West Bengal a•dokni political dolko Meghalaya a•dokni manderang maming dakeba ra•chakna man•jawa ine parakataha.
Mamata Banerjee-ni dilenggipa TMC sorkariko, India a•songo tangka cha•batsranggipa sorkari ineba Mawrie matnangataha.
BJP-ni dilgipa Narendra Modi-ko ‘gipin biaponi’ ine matnangahani giminba ua Banerjee-ko raken jegalataha.
TMC-ni ‘WE Card’ scheme-ko jegalatengon, ia scheme West Bengal a•dokon chu•sokgipa ong•jahani gimin Meghalaya a•dokni manderang ia scheme-ko maming dakeba ra•chakjawa ine BJP-ni state president parakataha.
Purno Sangma sagiko mittelpile aganangskaengon, ua somoirango Purno Sangma sagi, TMC-ni noksachi election-rango chea ong•ja indiba ua an•tangni gunchisa chegipa ong•aha aro Garorangba uko party-ni gimin ong•ja indiba uni kamni giminsa ma•sitoka ine Mawrie parakataha.
