Shillong, Jan 27: Meghalaya a•doko National People’s Party (NPP)-chi dilenggipa Meghalaya Democratic Alliance (MDA) sorkario bakrimaniko Bharatiya Janata Party (BJP) ra•pilkujawa ine Sukrobar salo, BJP-ni national vice president aro Meghalaya in-charge M Chuba Ao parakataha.
Election-ni ja•man BJP, NPP baksa kamrangko ka•rimpiltaigenma ine sing•anina aganchakaniko on•angengon, politics-ode jeba ong•na man•aia aro election-ni ja•man BJP, NPP baksa bakrimpiltaiani cholrang dongaia ine Ao parakataha.
Ia chang Meghalaya Assembly election-o BJP, a•dokni pilak dam 60 constituency-rangon susaenga aro ia changode bang•bate seat-rangko cheenba sorkariko rikna ka•dongenga ineba Ao parakataha.
Manipur sorkario NPP-ko rimnapjani gimin janapatengon, Meghalaya a•dokode iandakgipa obosta ong•jawa ine BJP-ni national vice president ku•rachakaniko on•angaha.
BJP gride darangba sorkariko rikna man•jawa ine janapattaiengon, a•dok sorkarirangko chalaina gita ma•mong sorkarini dakchakaniko nanga aro Meghalaya a•dokoba jolni political dolrangde an•tangari sorkariko rikanio BJP-ko nangtelaigen ine Ao parakataha.
