Tura, Feb 10: Meghalaya a·dokni nangrime bikotgimin All Meghalaya Civil Society (AMCS), da·al Budbaro Tura-ni Rikman Continental Conference Hall-o tom·e chanchirimaha.
KSU, GSU, AYWO, FKJGP, ADE, HNYF aro RBYF iarang gimik nangrimgimin dolni da·alo tom·e chanchirimanio, Khasi Hills aro Garo Hills-ni dingtang dingtang NGO-ni dilgiparang mikkangchi ILP-na dabianirangko maikai bilakbatatna man·gen ia miksonganio jinma ku·mongrimangaha.
“Hai an·ching GHADC election ja·man ILP-na bilake dakgrikna, nanga ong·ode an·ching district council election-ko boycott ka·na, gipin jatrang eleksino susana man·jawa aro Garo Customary Law (GCL)-ko an·chingna tarie legalise ka·e niamko tarichina dabianggen, an·ching Garo Hills gimikchi re·rurue kam ka·na nanggen. Una agreba, a·dok damsa-damgipinni sima-arini mamla jeon Rongsai-o Assam-ni Rabha-rang aro Bangal-rang an·chingni a·ako ra·seke, Meghalaya-ni ning·on Assam ine dokanrango seaniko nikna man·enga aro GHADC-ni office-koba apsandake ra·sekaha. An·chingni Garo Hills-o donggipa Shyamnagar aro Balachanda constituency-o gipin jatrang MDC-na chakatgen, una NPP, Congress, NCP aro gipin political dolrangko gipin jatrangna tikit on·jachina didiangaha.
GHADC, A·chikrangnisa uni gimin GHADC-ko chalaina aro MDC chakatna A·chikrangsa bil donga gipin jatrang ong·ja, uni gimin A·chiknan tikitko on·na nanga” ine GSU-CEC-ni padot Tengsak Momin didiangaha.
Iarangna agreba mingsa nangchongmotgipara A·chik ku·sikko 8-gipa schedule-o napatna nangenga, maina iachi IAS, IPS, IFS aro MCS porikkarangko A·chik ku·sikchi sena-jotna man·gnok, India a·song gimiko A·chik ku·sikko ra·chakgnok. Uni giminsa GSU, ADE aro AYWO A·chik ku·sikko 8-gipa schedule-o napatchina dabienga. Apsandake Khasi Hills-ni KSU, FKJGP aro gipin organization-rangba Khasi ku·sikko 8-gipa schedule-o napatchina kingkot dabienga ineba union-ni padot taldapataha.
Indake ong·engon AMCS-ni mongsongbatgipa minggittam dabianiranga ILP, napram aro ong·katram (Entry/Exit point) baksa MRSSA aro Khasi aro Garo ku·sikko 8-gipa schedule-o napatchina dabiani ong·enga. Ia minggittam dabianirangko Meghalaya a·doko ra·gate on·na nangchongmotenga, ong·jaode a·brini manderangni a·dok-chigarangko rorirang ra·sekgnok aro a·doktangon jakgitele janggi tangna man·jawaha, gipin jatrangni sasono dongna nanggnok, uni gimin hai dingchikbate kam ka·angna ine KSU-ni padot ku·mongrimaniko on·angaha.
“Chinga dingtang dingtang NGO-rang baksa nangrime skangonin ILP-na dabibaenga, indiba ma·mong aro a·dok sorkari chingni dabianiko knachakjaha, uni gimin da·o an·chiung ku·monge ia dabianiko bilakbatatna, ILP-ko man·kuja dipet dontongjawa,” ine FKJGP-CEB-ni padot aganaha.
Batanggimin 2013 bilsionin Inner Line Permit (ILP)na dol 13 NGO-rang dabibaenga, indiba da·alona kingkingan ma·mong aro a·dok sorkari iako chu·sokate on·kuja. Ua somoio a·dok sorkari, ILP gitan apsanaigipa niam, Meghalaya Residents Safety and Security Act (MRSSA)ko ra·gate niamrangko taridape on·gen ine ku·rachakachim, indiba uaba da·alonan chu·sokkuja. Uni gisepon Meghalaya a·doko napram aro ong·katram biaprangko donchina dabiahachim, ukoba da·alonan chu·sokatkuja. Unbaksana Garo aro Khasi ku·sikko 8-gipa Schedule-o napatchina gitaba dabienga ine FKJGP-Garo Hills Zone-ni padot Pritam Arengh agan-talataha.
AMCS, Tura songjinmao tom·aniko ong·ate Khasi, Jaintia aro Garo jatgittamni NGO-dilgiparang tom·ao dongpae mikkangchi ia minggittam dabianirangko chu·sokatkuja dipetna rakbate ja·kurangko de·angna aro ku·mongrime kamko ka·angna tik ka·an baksa, dol 7 NGO-rangni dilgiparang apsan miksonganio bilake ja·ku de·e ma·mong aro a·dok sorkario ILP, napram aro ong·katram, MRSSA aro Khasi aro A·chik ku·sikko 8-gipa Schedule-o napatkuja dipet dondikgija kingkot dabiangna ku·mongjolaha.
