Shillong, July 23: Union Home Minister Amit Shah, Sonibar salo Shillong-ona sokbaenba, salgro salaram a·dokni chief minister-rang baksa salgro salaram a·dokrango ong·enggipa obostarangni bidingo, COVID-19-ni bidingo aro gipin nangchongmotgipa kamrangni bidingo agangrikanggen ine Sukrobar salo official-rang parakataha.
Shillong aro Guwahati-o donggipa official-rangni u·iatani gitade, Amit Shah-ni salgnina Meghalaya aro Assam a·dokona re·baanio, ua gipin program-rangoba bakko ra·anggen aro ia a·dok damgnini adita project-rangkoba a·bachengate on·angjolgen.
Re·anggipa January-ni 23 tarikoba Union Home Minister, Shillong-ona re·bae, North Eastern Council (NEC)-ni chang 69-gipa plenary session-o bakko ra·angahachim aro ua somoioba ua salgro salaram a·dokrangni governor-rang, chief minister-rang aro gipin official-rangko grongangahachim.
Sonibar saloba ua salgro salaram a·dokrangni chief minister-rang, chief secretary-rang aro DGP-rangko gronge, salgro salaramni damchet a·dokrango ong·enggipa obostarang baksana COVID aro gipin nangchongmotgipa kamrangni bidingo agangrikangna sienga.
Uni re·baanio mongsonggipa tom·aniara Umiam-o donggipa North Eastern Space Applications Centre (NESAC)-ni headquarter-o ong·gen jeon ua, salgro salaram a·dokrango space science aro technology centre-ko namdapatani gimin chanchirimdilanggen.
Union Home Minister Amit Shah, NEC-ni chairman-ba ong·e NESAC-ni president-ba ong·engachim.
NESAC-ni tom·aniko ong·atanio Development of the North Eastern Region (DoNER) Minister G Kishan Reddy, Union Science & Technology aro Space Minister (Independent charge) Jitendra Singh aro Indian Space Research Organisation-ni Chairman K Sivan-ba dongpae bakko ra·angnaba gnang ine ka·dongsoenga.
Uni salgnina Meghalaya a·dokona re·baanio Union Minister, Umsawli-ni cryogenic oxygen plant, Mawiong-o donggipa inter state bus terminus (ISBT), Sohra-ni Wahshari-o bol ge·ani program aro Khliehshnong-o Greater Sohra Water Supply Scheme-ko a·bachengate on·angan baksana Robibar salo Guwahati-ona re·angna skang, Shillong-o donggipa Assam Rifles-ni headquarter-koba re·ange niangjolgen ine official-rang u·iataha.
