Tura, April 20: India a•songni gipin biaprango gitan Meghalaya a•dokoba COVID-19 giprorotaiengahani gimin sabisini giproroaniko champengsona gita South West Garo Hills a•jao Community COVID Management Team (CCMT)-rangko songna manchiangaha.
COVID-19-ni giproroaniko champengsona gita Mongolbar salo South West Garo Hills a•jani District Task Force-ni gita tom•e chanchirimangani somoio, South West Garo Hills a•jani Deputy Commissioner Ramakrishna Chitturi, jinmana aganprakengon, COVID-19-ni giproroaniko champengsona gita a•jani dingtang dingtang biaprango CCMT-rangko songchina didiangaha.
Ia tom•aniko ong•atanio SWGH a•jani Superintendent of Police (SP) Siddharth Ambedkar, dingtang dingtang block-ni BDO-rang, health officer-rang, toromko dilgiparang, NGO-rang aro bazar committee-rangba dongpae bakko ra•angaha.
An•tangtangko simsake rakkichina gita a•jani manderangko didiangengon, da•o dipet South West Garo Hills a•jao COVID-19-ko man•taigipa dongkujaengoba mande sakantian mikrake dongna gita nangenga maina ia chango COVID-19 ta•rakbate giproroenga ine SWGH a•jani Deputy Commissioner mikrakataniko on•angaha.
Gipin biaprangoni re•baenggipa manderangko songtang aro gittimtangni manderangan sandie nanga gita ja•kurangko de•chinaba ua didiangaha.
Tom•anirango manderang agre bang•e tom•chimongjachina aro songo noko ia sabisini bidingo agan-talate on•anirangko dakchina gitaba SWGH a•jani DC, songni nokmarangko, gaonburarangko, VEC-rangko aro gram sevak-rangko didiangaha.
Sorkarini dongimin dingtang dingtang niamrang, jekai mask-rangko ganjringani, saksa sakgipinoni chel•tanggrike dongani, jakrangko rongtal an•tale rakkiani aro uandakgipa niamrangko ja•rikchina gitaba ua manderangko didiangaha.
Ia tom•anio South West Garo Hills a•jani District Immunisation Officer Dr Noreen A Sangma-ba jinmana aganprakengon, ia chango giproroenggipa COVID-19, batanggimin changona bate chang 80 batrikrikgipa aro kengnigipa ong•enga ine talatangenba, bilsi 45 badegimin manderang pilakkon ia COVID-ni tikarangko su•e ra•china didiangaha.
