Tura, Aug 24: Meghalaya a·doko gama ge·ani kamrangko tang·doatna gita miksonganio, a·dokni Chief Minister Conrad K Sangma, sorkarini ra·gatgipa ‘FOCUS’ program-ni ning·o a·dokni dingtang dingtang biaprangona wenroroe game ge·e cha·enggipa manderang baksa agangrikenga aro uandaken Mongolbar saloba ua South West Garo Hills a·jaona re·ange game ge·e cha·giparang baksa Ampati-o agangrikeaha.
Ia Farmers’ Collectivisation for Upscaling Production & Marketing Systems (FOCUS) program-ara game ge·e cha·giparangko ku·cholsan ong·ate ‘Producers Group’-rangko kulienba tangka paisani gita dakchake on·na Meghalaya Basin Management Authority (MBDA) baksa sorkarini nangrime ra·gatgipa program ong·achim.
Ampati-o game ge·e cha·enggipa manderang baksa agangrikengon, MBDA-ni dakchakanichi game ge·e cha·giparangna aro bading chiwalgiparangna training-ko on·na gita a·dok gimikon Prime Hub-ko kulienga aro bakan ia Prime Hub-ko South West Garo Hills a·jaoba kulignok ine Chief Minister parakataha.
Game ge·e man·gipa bosturangko palbadingatna, sud grigipa loan-rangko man·e on·na aro gipin dakchakanirangko on·na gitaba sorkari, a·doko game ge·e cha·giparang aro bading chiwalgiparang baksa nangrime kamko ka·enga ineba ua aganaha.
Gama ge·ani kamrango pangchake janggi tangenggipa a·dokni manderang, sorkarini ra·gatgipa ia program-oniko bang·a namgnirangko man·china gitasa a·dok sorkari ia program-ko tariaha ineba Chief Minister parakataha.
A·doko game ge·e cha·enggipa manderangni namgnina sorkari kamko ka·enga ine talatangengon, iandakgipa dingtang dingtang program-rangchi game ge·e cha·enggipa manderangna sorkari dakchakanirangko on·angkugen ine Chief Minister parakataha.
Ia program-ko ong·atanio ua dingtang dingtang producers group-rangna tangka paisani gita dakchakanirangkoba on·angjolaha.
