Tura, Oct 27: South West Garo Hills a·jao ge 10 bangbang ong·enggipa Lower Divisional Assistant (LDA) post-rangna mande rim·ani result-ko mija antio District Selection Committee-ni parakatgipao joltangni candidate-rangna on·pilgija a·palni manderangnasa on·aha ine matnangatenba, a·jani dingtang dingtang NGO-rang iako ra·chakna gita jechakange, apsan post-na gital dake mande rim·aniko ong·attaipilchina dabiangaha.
Mija October 17 tariko, DSC-ni parakatgipa result-rangko dolgittam organization-rang, jekai GSU South-Western zone, AHAM aro NGCO jegalatenba, joltangoni kamna galgiparang inditan bang·oba a·palni candidate-rangnasa cholko on·bataiaha ine matnange aganangaha.
Ia apsan post-na gital dake mande rim·piltaianiko ong·atchina gita dabian baksa, DSC-ni parakatgimin result-rangko uamangni ra·chakna man·gijaniko parakange, Sukrobar salo, GSU-ni padot Megadeth M Marak-ni dilanichi a·jani Deputy Commissioner Pa R P Marak-ko grongangaha.
Ia LDA post-na manderangko seokaniara, a·dok sorkarini mija June 14 tariko on·gipa office memorandum-kon pe·aha, maina office memorandum-ni gitade a·jani ning·o dingtang dingtang kamrangna mande rim·aniko dakengon a·jatangni manderangnasa skanggipa cholko on·na nangachim aro minggipinara, Garo Hills-ni obostaode, Khasi-Jaintia jatoni kamna galgipa dongjagenchimode jatgnina a·kanggimin 80 percent-kon A·chik jatsa man·na nangachim ine Megadeth Marak matnange aganangaha.
Indake ong·engon, ia dolgittam organization-rang, DSC-ni parakatgimin result-ko den·gale kamna mande rim·anio office memorandum-ko ja·rikenba porikkarangko aro interview-rangko gital dake ong·attaipilchina gita sorkario dabiangaha aro iani bidingo kacharini do·gako doktikena gita NGO-rang mikrakatanikoba on·angjolaha.
Iakoba poraie nina man·gen: Dorambok songo health sub-centre-ko kulia
Watch
