Tura, Nov 28: Robibar salo, Toljawa Fishery Cooperative Society Limited-ni gita milsi pesusaaniko South West Garo Hills a·jani Ampati Kumali Gaon-o donggipa Toljawa pokkrio ong·atangaha aro ia milsi pesusaanio gram 935 ong·gipa Grasscarp na·tokko man·e, Tura Lower Wadanang-oni Stevie T Sangma, gong lak 1 boksisko man·angaha.
Ia milsi pesusaanio Meghalaya a·dok gimikoni sak 207-mangni gita milsi pegiparang bakko ra·angaha aro uamangoni sakgittamnaba gong 10,000 ka·e ka·dimeatani boksisrangko on·angaha.
Ia consolation prize-ko man·anggipa mande sakgittamara Tura-oni Jonis Ch Marak, Sanish S Sangma aro Purakhasia-oni Niyame M Sangma ong·a.
Ia milsi pesusaaniko ong·atani bidingo Toljawa Fishery Cooperative Society-ni Kamal Koch, Hub News-na talate on·angengon, ia milsi pesusaaniko uamang bilsio changgni dake ong·atna miksongenga ine milsi pegiparangko ia biapona re·bae bakko ra·erongchina gita didiataha.
Ia milsi pesusaaniko ong·atna gita Hub News-ba dakchake on·angaha aro ia milsi pesusaaniko ong·atanio South West Garo Hills a·jani Deputy Commissioner Ramakrishna Chitturi, mongsonggipa sokgipa ong·e bakko ra·angaha.
Ia milsi pesusaaniko ong·atanio, GHADC-ni Chairman Rakesh Sangma, MDC Pramod Koch, Betasing Block-ni BDO Winje RG Momin aro gipinrangba dongpae bak ra·angaha.
