Shillong, May 31: Robibar salo, Shillong songjinmani Ganesh Das Hospital-o an·o dongenggipa nurse saksani siani a·selko sorkari am·sandiataha ine Sombar salo a·dokni Health & Family Welfare Minister AL Hek parakataha.
Iani bidingo kobor ra·timgiparang baksa agangrikengon, jadok atana an·o dongenggipa nurse saksani siani koborko ua man·soaha aro iani bidingo ua report-ko bi·atenga ine Hek parakataha.
Indake ong·engon, COVID-19 man·e sianggipa nurse-ara ua somoio COVID-ni kamrangko ka·jaengachim ine Health Services (MI)-ni Director Dr Aman Warr talataniko on·angskaaha.
Dr Warr-ni parakatani gitade, hospital-o kam ka·enggipa nurse-rang an·o dongenga ine u·iataniko man·soahaon uandakgipa nurse-rangkode COVID-ni kamrangko ka·atrongjachim.
“Apsan daken ia nurse-koba COVID-19-ni kamo donatjaha aro uko general ward-osa kam ka·atengachim,” ine Dr Warr aganaha.
Iandakmiting somoirango an·o donggipa me·chikrangkode kamrangko ka·atna namen man·dikani ong·enga ineba DHS (MI) parakataha.
“Uni gimin chinga an·o donggipa me·chikrangkode kamoniko watchina aro uamangni biapo gipin kam ka·giparangko donatskachina a·dok sorkarina sedoataha. Chingni mol·molaniko sorkariba knachakaha,” ine Dr Warr parakataha.
An·o donggipa me·chikrangko office-ona re·bajachina re·anggipa May 17 tariko sorkarini u·iatgipani bidingo sing·on, COVID giproroengmiting somoio an·o donggipa pilak me·chikrangkon office-ona re·bagija noktangtangoni ka·china gitasa sorkari ge·etaniko on·aha indiba da·o gita maiba a·sel ong·ani somoirango health worker-rangde noktangtangoni kam ka·na gita man·ja aro office-rangona re·batelna nangao ga·akaia ine Dr Warr parakataha.
Hospital-rango kam ka·enggipa pilakan hospital-rango sabisiko man·enga ine matnangna man·jawa maina basakobade hospital-rango kam ka·giparangba korosrang ka·na re·e gipinrangko grongenga ineba Dr Warr talataniko on·angaha.
Sianggipa nurse-ni nokdangna sorkarini gita on·pilskaanirangko talatangengon, uamangna gong lak 50-ni insurance baksana ex-gratia payment aro sorkarioniko gipin man·gnirang donga ine DHS (MI) parakataha.
