Shillong, April 20: A·dokni PHE Minister aro Williamnagar-ni MLA Pa Marcuise Marak-ni bimingo tol·e manderangoniko tangka bi·e ra·enggipa manderangni kosako FIR-ko segataha ine Pa Marak, Bristibar salo koborna u·iataha.

Ia obostara batanggimin adita salna skang, Pa Marak-ni songremiting somoio ong·ahachim, jeon ong·gija kamko ka·enggipa manderang Facebook aro Instagram-rango ge·gni tol·gipa account-rangko Pa Marak-ni bimingo kullienba dingtang dingtang manderangni gimin tale ba ma·sie ra·anirangko dakna aro tangkarangko dabie ra·na gita uamang, uni bimingko jakkalahachim.

Ia mamlao Pa Marak-ni depante Tengrik M Sangma, bakan Shillong, Police Bazar-ni Sadar Police station-o niam gita badi ka·doangaha ine Pa Marak janapataha.

Pa Marak-ni aganani gita, ia manderangara, assembly-ni agan-chalaitimgipa gitcham Pa Metbah Lyngdoh-ni bimingo iana skang tol·e manderangoniko tangka dabie ra·giparangan ong·achim ine police-oniko talna gita man·aha aro iamang, sanabade Assam, Gurgaon aro Leh Ladakh-oni dingtang dingtang accocunt-rangko on·esa tangkarangko dabiahachim.

Mitam manderangde, iani bidingo mamingko ma·sijae minister an·tangan ine Google Pay gita tangkarangkoba wattokahachim, indiba rasong gnangbee uamangni tangka watatgiparang sokangjaesaha ine Pa Marak janapatenba, uamangko ja·kol sanna gita police-rang jotton ka·enga, indiba bang·bata uamangni jakkalgipa IP address-rangan dingtang dingtang biaprangkosa mesokskaaha ineba ua u·iatangaha.