Guwahati, March 16: Adasuko jakkale operation-ko dakengmiting somoio Army-rangni jakkalgipa Cheetah helicopter ba adasu, Bristibar salo, Bomdila-ni saliramchipak Mandala sambao kamchipe a·sel ong·anio sakgni manderang siaha ine koborna parakataha.
“Arunachal Pradesh, Bomdila samba jolo Army Aviation Cheetah adasuko jakkale operation-ko dakmiting somoio Bristibar pring 9:15 bajimangon ATC baksa koborko watgrika dongchipjaha” ine Defence PRO Colonel Mahendra Rawat parakataha.
Adasu baksa maming kobor dongchipjahani gimin, bakbakan Indian Army, SSB aro ITBP-ni dolbonga sandiatgiparangko watatenba am·sandianiko dakatani ja·man, kamchipgipa adasuko Mandala-ni salaramchipak Banglajaap song sambaoniko man·eaha ine koboro parakataha.
Ia a·selni bidingo, Defence PRO Colonel Rawat, adasuko chalaigipa pilot aro co-pilot a·selo janggiko gimaataha ine parakatan baksa, a·sel ong·ani ja·pangko ma·sina gita sandiataniko dakchina ge·etaniko on·aha ineba agandapataha.
Batanggimin 2022 bilsini October jaosan, Tuting songjinmaoni km 25 mang chel·gipa Arunachal Pradesh-ni Upper Siang district-ni Migging song sambao Indian Army-ni adasu kamchipgipaao sakbonga Army-rang sina gita nangahachim ine nikatna gita man·gen.
