Itanagar, Jan 03: Mongolbar salo, Union Defence Minister Rajnath Singh, Arunachal Pradesh a·dokni Siang a·jao, Siyom dolong baksana gipin ming 27 project-rangko a·bachengate on·angaha.

Adita salrangna skang, Tawang jolo Indian army aro Chinese PLA-ni gisepo adita dinggrikangani ja·man, a·songni Union Defence Minister, skanggipa changna Arunachal Pradesh a·dokona re·bae, ia project-rangko a·bachengate on·angaha.

A·song damgnini kenchakna nanggipa simarango Indian army-rang ta·rake re·rurana man·na gita ia ming 28 project-rangko gong kror 724.3 koros ong·e matchotatahachim.

Ia ming 28 project-rangoni mitamrangara Basti dolong, Bhaironghati-Nelong rama aro Thangu dolongrangba ong·achim.

Union Defence Minister Rajnath Singh-ni Parliament-o aganani gitade, 2022 bilsini December 9 tariko, China a·songni People’s Liberation Army (PLA), Tawang sector-ni Yangtse jolo donggipa Line of Actual Control (LAC)-o napdrabana jotton ka·ahachim indiba Indian army-rang, uamangko ka·dongbee warachaksoenba, biaptangtangona katatpilna man·ahachim.