Itanagar, June 11: Mija Sonibar salo, Arunachal Pradesh-ni Kamle a·jani ning·ogipa Kemliko minggipa song samba aro Godak-oni Raga-ona dakanggipa ramadilo gari bolsa a·kuangchina ga·akonange a·sel ong·anichi komibeoba sakbri manderang siaha aro sakbonga gipinrang bilongbee jokkom ong·aha ine koborna parakataha.
Koborni gitade, Tata Sumo bolsa adita sak manderangko gate Daporjio-oni Itanagar-chipakna mikkange re·angengmiting somoio pring 8 aro 9 bajimangni gisepo Kemliko song sambao a·sel-obostako chagrongahachim.
Ramaoni tang·srote a·kuangchina ga·akonange a·sel ong·anio sianggiparanga, Longku Tad, Tagam Baja, Saiful Islam aro Yamen La ong·a ine ma·sina gita man·aha. Uandake, jokkom ong·giparangko sambajol hospital-ona sana-bananiko on·na gita rimangaha ineba koborna u·iataha.
