Shillong, August 10: Assam a•dok, dao•ororo Jihadi bobil dolrangni ma•chakram biap ong•enganina, re•baenggipa antio A•songni Jakgitelaniko maniani salna Sorkari nirok simsakanirangko rakbate, bilakbate dakna nangenga ine Meghalaya Home Minister Lahkmen Rymbui budbar salo parakataha.
Bobil dolrangni namgijagipa kamrangko ka•chakram biaprangoni Assam a•dokba damsa ong•paa ine report-rangko man•anio pangchake Meghalaya Police dol, bobilrangni kamrangni kosako nirok sandianirangko bilakbate ka•na nangenga maina bobilrangni namgija kamrangna ba Jihadi dolrangna a•doko biap dongja ine Minister Rymbui janapataha.
Uandake Intelligence dol, nirok-simsakani kamrangko bilakbate ka•engon, a•doko songdonggipa manderangba chanchichipanirang gnanggipa manderangna ba kamrangna gisik on•pae simsakanina ja•ku de•paanikoba talataha.
“Jihadi bobil dolni kamrang a•doknasan kenaniko ra•baani ong•aija, Central Agency baksa kobor ra•grikanirangko gipin a•dokrangba daka maina ian a•song gimiknan kengnigipa aro mikraksamsoe dongna nangani ong•a,” ineba Rymbui parakataha.
