Guwahati, July 19 : Bilsi chu•onggija bia ka•ani aro mikkang nitegija kakket bichalko on•aniko ra•dona gita, Assam a•dok sorkari, Assam Muslims Marriages and Divorce Registration Act 1935 aro uandakgipa niam reti-rangni palo Assam Repealing Bill 2024 a•bachengatna sia.
“Bilsi chu•ongkugijagipa me•chik bi•sarangko bia ka•aniko champenganiko dakanichi, an•chingni demechik aro no-abirangna naljokaniko on•a gita chinga ia ja•ku de•aniko dakenga,” inenba Assam a•dokni Skotong Minister Himanta Biswa Sarma, uni X(Twitter)-o parakataha. Ia gitalgipa niam, pilak jatrangni gisepon bia ka•ani aro galgrikani niamrangko rakbatatan baksana je cholchiba ba je biapoba bilsi chu•ongkugijagipa bi•sarangko bia ka•aniko dakna on•jawa.
Assam Legislative Assembly-ni monsoon session-o ia bill-ni gimin chanchirimaniko dakanggen aro sorkarini ning•o Muslim bia ka•aniko segatna gita Cabinet gital niamrangko a•bachengate on•china gita didianiko dakangaha.
Assam Muslim Marriage Act-ni gita bilsi chu•ongkugijagiap bi•sarangko bia kana on•a. “Chinga uko den•galenba niamrangko dingtangataha. Da•o chinga ge•sa bill-ko tariaha jean Muslim bia ka•anirangko sorkarini ning•osa segatna nang•gnok,” ine ua agandapangkuaha.
Bilsi chu•ongkugijagipa bi•sarangko bia ka•aniara mongsongbate mande jellani komigipa jatrang neng•nikanirangko man•rongbata. “Bilsi chu•ongkugijagipa bi•sarangko bia ka•anide indake ong•ja. 80% mangni gita ia jella komigipa jatrango ong•bata aro jelbra jelsrugipa jatrango ia 20% mangni gita ong•a. An•ching ia chonaoni bia ka•aniko toromni dakbewal dake ra•na nangja,” ine aganenba, November aro December jarango iako bon•atna gita ja•ku de•anio bang•bea manderangko rim•e pattok ning•o donani giminba ua aganangkuaha.
Sorkarini gita iako champengna ja•ku de•ani biterangko an•ching nikna gita man•aha, chongmotan 2022 bilsini April jarango dambe an•o kegiparang sak 9,330-rang ong•achim, indake da•o 2024 bilsini June jao sak 3,401-ona tang•onaniko nikna gita man•aha. Iana agreba, Assam sorkari saksana bate jik ba se ra•aniko sorkarini dongimin niamni kosako ba niamni a•palo dakani ine a•dokni niam gita parakatna tik ka•angaha.
Sarma, uni sorkariko rikani 2-gipa bilsio, ma•mong sorkarini gita Uniform Civil Code (UCC)-ni bak gita saksana bate jik ba se ra•aniko champengataniko ra•gatna siengaha ine parakatahachim. Bilsi sokkugijagipa bi•sarangko bia ka•aniko bang•e rim•a man•ani somoio, bang•a ja•delgimin me•asarang bang•a bilsi sokkugijagipa bi•sarangko bia ka•gimin ong•achim ine u•ina gita man•aha, jeni a•selan iani bidingo name chanchibewalaniko dakna nangao ga•akaha, indake Assam Legislative Assembly-ni re•baenggipa budget session-o iako champengna gita bill-ko ra•gatna nanggen ine a•dok sorkari mangsongaha. Aro iako bon•atna expert committee-ni gitaba report-rangko on•manaha aro ia janapgimin bill-ni bidingo king 150 kupattianirangkoba man•soaha, ineba Sarma u•iatangkuaha.
Assam sorkari, ia dingtanganiko ra•bana gita kangkare kae dongengan baksana songsalo iandakgipa namgija bewalrangko bon•atsrangna, kakket bichalko on•a aro a•doko songdongenggipa pilak manderangnan mikkang nitegri ong•atna miksongenga.
Na·simang ia video-koba nina man·gen:
Na·simang iakoba poraina man·gen: Panchayat election-na so•so jengjeng ong•ani bidingo Congress-ni dilgiparang Tripura-ni Governor-ko grongea
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
