Guwahati, March 31: Assam a•doko Assembly election-ko ong•atengani gimin Congress dolni dilgipa Rahul Gandhi, salgnina Assam-ona re•baaha aro uni sokbachengani Budbar salo ua Assam-o mingsinggipa Kamakhya Temple ba mite nokko re•ange nieaha.
Kamakhya mite nokona re•angani ja•man kobor ra•timgipa manderang baksa agangrikengon, BJP dol gita ong•gija uni Congress dolde, election-ni somoirango manderangna ku•rachakanirangko chu•sokate on•ronga ine parakangaha. Punjab, Chattisgarh aro Karnataka a•dokrango uni dol, game ge•e cha•giparangni loan-rangko watna ku•rachakaha aro bilona re•baani ja•man ia ku•rachakanirangko chu•sokataha ineba Gandhi aganaha.
Congress dolni Assam a•doko songdongenggipa manderangna ku•rachakenggipa mingbonga kamrangni gimin janapatengon, ia ku•rachakanirangoni mingsade cha baganrango kam ka•enggiparangni hajirako gong 365/-ona bariatna ku•rachakanian ong•enga aro ia ku•rachakaniko Congress dol chu•sokatchongmotgen ine Gandhi parakataha.
“Chingade BJP dol gita manderangna ku•rachakanirangko bon•chipatgipa ong•ja aro chinga je ku•rachakanirangko ia election-o on•enga, ia pilak kamrangkon chinga sorkari rikna man•genchimode chu•sokate on•gen,” ine Congress dolni dilgipa aganaha.
Cha baganrango kam ka•enggiparangni hajirako bariatna ku•rachakan baksana Congress dolni gipin mongsonggipa ku•rachakaniranga, Assam-o Citizenship Amendment Act (CAA)-ko ra•gatna on•gijani, lak 5 chadamberangna kamrangko on•ani, nokdang ge•antinan japrako unit 200 bijoliko indin on•ani, noko donge kam ka•enggipa me•chik sakantinan gong 2,000 tangkarangko japrako on•na aro uandakgipa ku•rachakanirangan ong•engachim.
Congress dolni dilgipa Rahul Gandhi, Mongolbar salon Assam-ona sokbaani ong•achim indiba sal namjani a•sel ua sokbana man•jahani gimin ‘Mahajot’-ko seokchina manderangko didie tarigipa video-ko watatskaahachim.
“Salrang namjani a•sel anga na•simangona sokangna man•jaha indiba chingni na•simangna mingbonga ku•rachakanirangko chu•sokate Assam-o namroro silroroaniko ra•bana anga ku•rachakenga,” ine Gandhi, Assam-o songdongenggipa manderangko Congress aro ia dol baksa bakrimenggipa dolrangna pu•onchina gita didiataha.
Indake ong•engon, BJP-ni dilgipa aro Assam a•dokni minister Himanta Biswa Sarma-ni kosako FIR ka•china didie, Congress dol, Assam a•dokni chief election commissioner-na sedoataha. Ia election-ni somoio mikkangchi uko campaign ka•na on•jachina gitaba Congress didiataha.
Congress baksa bakrimenggipa Bodoland People’s Front (BPF)-ni chairperson Hagrama Mohilary-na ka•mikkenatani kattarangko aganaha ine matnangenba, BJP minister-ni kosako FIR ka•china Congress dol didiataha.
