Guwahati, Oct 09: Niamrangko rake ra·gatahaoba Assamo sruksruk matchu badinganiko bon·atna man·jaenga ine nikenga. Kamrupo Bir Lachit Sena dolna kam ka·gipa saksa matchu badingsruke salanggipa DI gariko dondikatna jotton ka·on ua an·tangsa saknaako man·aha. Ua saknaa man·gipa mandeko Jyotish Kalita minga ine u·ina man·aha.
Ia a·sel ong·ani bidingo AS01-QC3247 registration nomborni DI truckko rim·aha aro uo gatanggipa matchu mangbriko man·aha. Matchu salgipa mande gariko mi a·pal sambao gale an·tangde katangahachim.
Bir Lachit Sena-ni mande saksa aganaha: “Chinga Deopani jolo ripeng saksako grongna re·angengachim. Unon rang·gitik, matchu gate ta·rakprete salbaenggipa gariko chinga niksoaha. Gariko dondikchina chin daksoon batesa chingko salpakangna jotton ka·aha, aro chingoni saksako nangpakangaha. Chinga gariko rikange srapna am·on uko salgipa gariko done katangaha.”
Ua agandapkuaha: “Chingni mandeko so·otna jotton ka·ahani gimin Palasbari Police Station-o FIR on·eaha. Ua mandeko man·adipet ta·raken rim·china chinga policeko mol·molaha.”
“Ia matchu badingsrukani kam namen dal·a, iano bang·a manderangan jak dongpaa. Ua matchu salgipa gari Mirzaoni Chandubi jolchipak re·angengachim. Matchu badingsrukako police champengna man·jaode chingan uko jako ra·na kam ka·gen.”
Ua jolo donggipa saksani aganani gitade, matchu badingsrukani bidingo niamko rakbeen ra·gatahaoba komiatna aro champengna man·kujaenga. “Salantian pring 5 bajioni a·bachenge, matchu badingsruke gatanggiparang ia jolko ta·rakprete gari salangronga. Indakgiparangko rim·china chinga policena aganengachim,” ua mande aganaha.
Re·anggipa August 12 tariko Assam assemblyo Assam Cattle Preservation Bill 2021-ko niam ba Act ong·ataha. Ia Act-ni gita, Hindu, Jain, Sikh ba uamangni olakiram nokni 5km ong·gipa biaprango matchu dokani aro palaniko champenga. Unbaksana, gipin dakgipa biaprangkoba songni-nokni dilgiparangni nikanio pangchake ua Act-o man·chapa.
Kosako janapgipa Act-ko nipile taridapaha. Taridaptaigipa niamni gitade matchu badingsrukgipa mandeni noko police nape sandina man·a, aro batanggimin bilsi dokni gisepo uni matchu badingsruke tangka man·gipa tangkachi ra·gipa mal-mattarangko kepe ra·na bil on·a gnang.
India-Bangladesh sima joljol aro Assam, Tripura, Meghalaya, Mizoram, aroba Bengal-ni salgro jolchipakni sima-ari jolrango niamni a·palo matchu badingani bilongbata.
A·songni dingtang dingtang bakrangoniko moba-ra·bagipa matchurangko sima-ari gita Bangladeshni be·en tariram aro matbigil tariram karkanarangona sruksruk watata.
Iakoba poraie nina man·gen: Sikkim-o chi bananichi Teesta Stage III Dam nisigalako man•a
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
