Guwahati, March 26: “Ia bilside Bihu-ko manirongenga gitan manianggen. Ong·jaode, chroke-mesae manderangko an·saodilgiparangna neng·nikani ong·gen. Uni gimin, sajinmako champengna simsaksoanirang jekai, mask-rangko ganani baksa ianpako Bihu-ko Assam a·doko manina on·china anga mol·molaha,” ine Assam-ni Minister Pa Himanta Biswa Sarma, Sukrobar salo parakataha.
“Lockdown ba a·dokko chipchangatani gimin sing·ani kattan dongna nanga. Kakketko aganode, iani gimin da·o chanchina gita mangba namgipa somoian ong·kuja” ine Pa Sarma, jean da·omitingde eleksinna campaign-rangko ka·eming gisiko namen ding·chaoaniko man·beenga, Sukrobar salo koborna talataha.
Da·o gnigipa gadango sajinmani sokbataengani gisepo, chrok-mesaachi manderangko an·saoatgipa dolrang ia bilsio Bihu-ko a·doko manina on·gen ba ong·jawa iani gimin ango sing·attokaha ine Health Minister aganaha. “Manirongbaenga gitan ia bilsiode manianggen ine anga uamangna raken ku·rachakataha aro Bihu-ko manianio maming namgijani dongja,” ineba ua aganangkuaha
Ia bilsini Bohag Bihu-ko re·baenggipa April jani 14 tarik (Butbar sal)oni manichakate April 16 tarik (Sukrobar sal)o matchotatgen.
