Shillong, Dec 2: Assam aro Meghalaya a·dok damgnini sima-ari jolo, mongsongbate Ri-Bhoi aro West Khasi Hills a·jani ning·ao golmal gnanggipa biaprangni gimin sandiate man·anirangko apsan chapdime dolgni regional committee-rang uamangni report-rangko da·o a·dokni skotong minister Pa Conrad K Sangma-ni songjinmaona re·bapilaniko sengenba uni jako on·na gita tarie donsoaha.
Indake ong·oba Pa Sniawbhalang Dhar-chi re·dilenggipa East Jaintia Hills district-ni regional committee, uamangni report-ko on·na somoiko bi·dapangskaaha.
Iani bidingo Bristibar salo koborna agananganio, a·dokni dakchakgipa skotong minister Pa Prestone Tynsong jean Ri-Bhoi district-ni regional committee-ko re·dilengachim, uamangni sandiate man·ani report-ko tariaha aro report-ko bon·kame tariani bidingo committee-ni memborrang Bristibar salo apsan asonge chanchirimangaha ine u·iataha.
Indake ong·oba Pa Tynsong, report-ni gimin maming talataniko on·nade jechakaha aro iako skotong minister-an songjinmaona re·pilani ja·man adita talataniko dakanggen ine aganangaha.
Unomiting, dakchakgipa skotong minister-ni chamber-o tom·e chanchirimao dongpagipa Nongpoh (Ri-bhoi)ni MLA Pa Mayralborn Syiem-ni aganangani gita, ian matchotkugijagipa kamsa ong·a aro skangni sorkariba 2012 bilsio aro una skang dingtang dingtang gadangrango aro somoi gita report-rangko on·angtokaha, apsandaken da·oni sorkariba ia neng·nikenggipa mamlako dal·e ra·enga aro Assam baksa simani bidingo golmalrang gnanggipako namate donna on·kangenganikoba mesokaha ineba ua agandapataha.
