Shillong, Nov 8: Meghalaya aro Assam a•dok damgnini simarango meligrikna man•jaenggipa biaprangoni damsa, chong•motan Tarabari songona ia antini gisepon ia a•dok damgnini dilgiparang, re•ange nianggen ine Sombar salo, West Khasi Hills-na songe on•gipa Regional Committee-ni chairman aro Meghalaya a•dokni Cabinet Minister Renikton Lyngdoh Tongkhar parakataha.
Tongkhar-ni parakatani gitade, iani bidingo ua Assam-ni Minister Atul Bora-na u•iatmanaha indiba uni aganchakanina ua sengkuenga.
A•dok damgnini dilgiparang, Sombar salon ia biapona re•angna miksongachim indiba Meghalaya a•doko gital district songani bidingo official-rang jakchakjaengani gimin ia songona re•angani tarikko ra•doatna nangaha ineba Meghalaya a•dokni PHE Minister parakataha.
“Chinga ia antini gisepon ua songona re•angnaba gnang aro ia anti ong•jagenchimoba mikkang antipode re•angtelgen. November 12 tariko re•na gita anga Assam Minister Atul Bora-na u•iatmanaha indiba obostarangko nichengna nanggen,” ine Tongkhar aganaha.
Meghalaya Minister-ni aganani gitade, skanggipa changna uamangni sima jolrangko nieani somoio jekai songni manderang uamang baksa bakrime agangrikahachim, apsan daken ia changoba uamang manderangni bakrimaniko man•na ka•dongenga.
A•dok damgnini simarango meligrikna man•jaenggipa biaprangko namatna gita a•dok damgnian regional committee-rangko songahachim aro ia committee-rangko a•dok damgnini cabinet minister-rang dilengachim.
Assam a•dok baksa meligrikna man•jaenggipa Meghalaya a•dokni damdok biaprangara, West Khasi Hills-o Tarabari, Gizang aro Hahim, East Jaintia Hills-o Ratacherra aro Ri Bhoi a•jao Boklapara aro Khanapara-Pilangkata jolrang ong•engachim.
