Tura, Nov 8: South Garo Hills a•jani Nengkong Se•el Adugre LP skul nokko rikenggipa contractor, ia skul nokko matchotatchipgija donengani a•sel skulo poraienggipa bi•sarang neng•nikanirangko chagrongna nangtokenga ine Garo Students Union (GSU) Karukol regional unit parakatenba, ia skul nok rikaniko nirokatchina gita Education department-ko didiataha.
“Ia skul nok ru•uta bilsirangonin nosto ong•e dongengahani gimin ia skul nokko rikpiltaina gita sorkari, 2015-16 bilsimangon sanction ka•e on•ahachim indiba ia kamko jako ra•e ka•enggipa contractor, da•onan ia skul nokko matchotchipjaengani a•sel skulo poraienggipa bi•sarang neng•nikanirangko chagrongna nangtokengaha,” ine GSU Karukol regional unit-ni president Matsram N Marak parakataha.
Maini a•sel ia skul nokko da•onan matchotatchipna man•jaenga, iani bidingo songni manderangna aro jolni NGO-rangna ta•raken talate on•na nanga ineba GSU Karukol unit-ni dilgiparang, ia skul nokko rikenggipa contractor-o dabiangaha.
