Guwahati, March 27: Assam-ni assembly aro parliament seat-rangko taridapani kamrang ong·engani gimin, ja·pangoni obostarangko talna gita aro ia kamo dingtang dingtang bak donggiparangko man·chape, songdonggiparang, political dolrang aro civil society dolrangni agananirangkoba knae ra·na gita India-ni Election Commission-ni chu·gimik dolan Assam-ona sokbatokaha.
Iana skang, Assam a·dokni constituency-rangna delimitation-ko dakanganiara 1976 bilsio ong·achim. Ua somoio, 1971 bilsini census-o pangchake, Delimitation Act, 1972-o on·sogimin gita Delimitation Commission, Assam-ni constituency-rangna seat-rangko tariangaha.
A·songni gipin bakrango, assembly aro parliamentary constituency-rangna seat-rangko tariani kamo Delimitation Commission-na chu·gimik daitokon on·e ka·atgenchimoba, Assam a·dokode a·songni Election Commission-nasa chu·gimik daitorangko on·skaaha.
Ia delimitation-ko dakani kamrango, a·songni aro a·dokoni dingtang dingtang political dolrang, manderangni seoke watatgiparang, civil society-rang aro social organization-rang baksa chanchirimna gita, Chief election commissioner Pa Rajiv Kumar baksana Commissioner-rang Pa Anup Chandra Pandey aro Pa Arun Goel-maang gimikan Assam-ona sokbatokaha.
2001 bilsini census-o pangchake, Assam-ni assembly aro parliamentary constituency-rangna seat-rangko taridapani bidingo kamrangko ka·na gita a·songni Election Commission, re·anggipa December jao parakatahachim ine nikatna gita man·gen.
