Guwahati, March 17: Class 10 board exam-o Science question paper-ko manderangni jako joksretatani bidingo golmalrang ong·angkuengon, Sukrobar salni bako Guwahati-ni Banunimaidan-o donggipa Secondary Education Board of Assam (SEBA)ni office mikkango Assam-ni bang·a chatro-chatrirang jingjengatangaha.

Jingjengatanio, department-ni chairman R.C Jain-ko chatrorangni sing·anina aganchakchina gita dabiange a·dokoni dingtang dingtang skulrango poraigipa chatro-chatrirang SEBA office mikkango jinma tom·dake jeglaniko dakangaha. Uandake, question paper joksoani changsasan ong·ja badita chang joksretna nanga ine sing·doangenba, iarang ong·taijawaha ine chinga maikai bebera·gen aro ian chatrorangko kal·akani kam ong·a ine jingjengatao bakko ra·gipa chatrorang agantokaha.

“Chairman baksa minit-bonga agangrikna nangnikesa chinga da·alo tom·dakahachim indiba chingna cholko on·jaha ine sakgipin chatro aganangskaenba, poraienggipa chatrorangde gamchatjama ine sing·doange, chingni poraianikoba iachin cha·sotenga!,” ine an·tangni suk ong·gijaniko parakataha.

Indake ong·engon, jingjengatgipa chatrorangni SEBA office-chi napdraanganiko police-rang raken champengataha.