Guwahati, May 7: Assam a•dokni Indo-Bhutan simao donggipa damgni entry point-rangoni damsao COVID-na porikka ra•ani cholrang dongkujaengani a•sel Bhutan a•songoni re•baenggipa garirang, maming porikka ra•ani grian India a•songona napbana man•enga ine kobor on•aha.
Dadagiri police station-oni koborko on•ani gitade, ia entry point-ara Chirang district headquarter-oni kilometre 70-mang chel•gipa biapo ong•a indiba ia entry point-o Bhutan a•songchipakni re•baenggipa manderangko aro mongsongbate truck driver-rangko India a•song ning•chipak COVID-na porikka ra•ani cholrang dongkuja.
Koborko on•ani gitade, Bhutan a•songchipakde re•ruraenggipa garini driver-rangko aro manderangko COVID-na porikkarangkoba ra•enga indiba India a•songchipak napbaenggipa garirangde maming porikka ra•ani gri re•napbaskana man•engachim.
Ia entry point-oni sepangbatgipa COVID-19 medical centre-ara km 10-mang chel•ao donggipa Santipur-o ong•a indiba ia gate-ode medical dolni manderang dongkuja ine official-rang parakataha.
Da•o dipet Assam a•doko sak 31,000-na baten COVID man•e dongenggiparang donga aro gimik sak 1531 manderang COVID-ni a•sel siangahachim ine nikna man•a.
Indake ong•engon, da•o dipet Bhutan a•songode sak 1161 manderangsan COVID-ko man•kuengpiti aro saksasan siengkupiti ine official-rang u•iataha.
