Guwahati, April 1: Re•anggipa March-ni 27 tariko Assam Assembly election-ni skanggipa bakko ong•atanio Assam a•dokni manderang, Congress dolchi dilenggipa ‘Mahajot’-na Red Card-ko mesokaha aro Assam a•dokni engine ge•gni donggipa BJP sorkarina an•tangtangni mohorko su•ataha ine Bristibar salo a•songni Prime Minister Narendra Modi parakataha.
Kokrajhar-o Assam election-na BJP-ni tom•bimonganiko ong•atanio a•songni Prime Minister, jinmana aganprakangengon, manderangni jegalenggipa dol baksa bakrimahani gimin Congress dolko sasti on•na nanga ine Badruddin Ajmal-chi dilenggipa All India United Democratic Front (AIUDF) dolko biming minggija parakataha.
“Robol kal•anio jekai ong•gija dakgiparangna ‘Red Card’-ko on•e kal•chakramoniko a•rikgala, apsan daken, Assam Assembly election-ni skanggipa bako Assam a•dokni manderang, Congress dolchi dilenggipa ‘Mahajot’-na Red Card-ko mesokaha. Assam a•dokni manderang, gnigipa changna engine ge•gnichi chalaienggipa BJP sorkarina an•tangtangni mohorko su•aha,” ine PM Modi aganaha.
Assam Assembly election-ni gnigipa bako dam 39 constituency-rangna Bristibar salo ong•atskaaha aro Prime Minister Modi-ni aganani gitade, ia saloba manderangni sikdepe seokani namen tang•doaha.
Assam a•doko Congress dolni dilanichi sorkariko chalaiengmiting somoio so•sojengjeng ong•anirarakosa nikna man•aiachim ine janapatengon, Assam a•doko BJP sorkari tom•tomaniko ra•bapilna man•ahani gimin ia tom•tomaniko maming dakeba ra•sekna on•jawaha ine Modi parakataha.
“Assam a•dokko nisigalna sigipa dol baksasa Congress dol bakrimaha indiba chinga da•o Assam-o tom•tomaniko ra•sekna gita uamangna cholko on•jawaha,” ine PM Modi aganaha.
Ru•utbea bilsirangni ja•manosa Assam-o tom•tomaniko man•piltaiaha aro da•o ta•raken namroro silroroaniko nikna man•engaha ineba Prime Minister parakataha.
“So•sojengjeng ong•atani kamrangko watgale an•tangtangko bame on•egipa bobil dolni manderangna sorkari, ku•rachaka gita pilakkon dake on•gen. Congress dolni sorkariko dilsretani a•sel Assam-o so•sojengjeng ong•anirangko nikna man•aha aro Bodoland jolrango maming namroro silroroanirang dongjaha,” ine Modi aganaha.
Bodoland-o songdongenggipa manderangni namgnina aro ia jolrango namroro silroroanina Bodo ku•sikko Constitution-ni Eighth Schedule-o ra•gatna siengaha ineba ia tom•anio a•songni Prime Minister parakataha.
