Assam, July 14: Assam a•dokni bilsi 18 ong•gipa me•tra saksa niamni ning•o champengako man•gimin ULFA bobil dolni kosako bakrimaniko on•e poedo seanina pattoko donata man•aoniko niamo watchina dabianirangna so•sojengjeng ong•engon, Assam Police niamo pangchakesa jagnina skang rim•ako man•aha ine talataniko on•aha.
Social media-o “Akou Korim Rashtra Droh” ba a•songni kosako bobil dingani ine poedoko see mesokanina ,UAPA ainni ning•o pangchake Barshashree Buragohain-ko Golaghat a•jani Uriamghat-oniko ia bilsini May 18 tariko rim•aha.
Niamo rim•ako man•gipa me•tra Jorhat-ni DCB college-o Mathematics-ko poraienggipa ong•achim; uandake ua re•baenggipa jao porikka dongani gimin uko porikka sena watchina uni ma•a paa Assam-ni Skotong Minister Himanta Biswa Sharma aro police dolo mol•mole dabianiko dakenga.
A•dokni kosako bobil ong•e chakatna didie peodo seaniko social media-o jinmana parakanian uni bobil dolrangna chakaniko mesokan baksa India a•song sorkarini kosako bobil dingna parakani ong•a aro iana chinga ainni gita rim•na nangao ga•akaha ine Special Director General of Police (Law and Order) G P Singh parakataha. Uni kamrangna niamo pangchake bichal ka•anirang ong•anggen ineba u•iataha.
Poedo seanimangmangna uko rim•jaha indioba bobil dolna bakrimaniko on•china didie seanirangnasa rim•aha ine kobor ra•ruragiparangna Assam Police-ni DGP Bhaskar Jyoti Mahanta u•iataha.
