GUWAHATI, Nov 26: A·dokni chu·gimik mande ra·aniko dakata baksa, changgittamna kingking Assam a·dokni skotong minister ong·anggipa gitcham Pa Tarun Gogoi-ni manggisiko da·al Bristibar attamchibara Guwahati-o donggipa mande so·chakram biap Nabagraha-o bon·kame so·aha.
Skotong minister gitchamni manggisiko bon·kame so·na skang toromni gita pilak dakna nanganirangko Assam-ni skotong minister Pa Sarbananda Sonowal, Health minister Pa Himanta Biswa Sarma aro hajal manderangni dongpaanio dakangaha.
Manggisiko so·ani somaio, Assam Congress dolni padot Pa Ripun Bora, a·dok BJP dolni padot Pa Ranjeet Kumar Dass, adita sak ministerrang, MP-rang, MLA-rang, politician-rang, sorkari official-rang, dingtang dingtang organization-rangni dilgiparang, nama-sikani on·giparang aro nokdangni manderang gimikan dongpatokaha. Manggisiko, skotong minister gitchamni depante aro Kaliabor MP, Gaurav Gogoi-ni jakchi so·aha.
Manggisiko so·na skang, Pa Tarun Gogoi sagini dongrikgipa mang sambao similgipa pulni bibalrangko donachi Assam-ni skotong minister Pa Sonowal, Pa Tarun Gogoi sagini jikgipa Dolly Gogoi aro ua somaio biapo dongpagipa gipinrang uko changsatai mande ra·anikoba dakrikkuaha.
Unomiting, Assam-ni All India Congress Committee (AICC)ni in-charge, Pa Jitendra Singh-ba ua somaio dongpae wate re·anggimin dolni dilgipako bon·chote mande ra·aniko dakangaha.
Pa Gogoi sagini demechik Chandrima, bohari Elizabeth Colburn aro manderangni pal CM gitchamko seoke watatgipa Titabor Assembly constituency-oni sak ritcha manderang gimikan uni manggisiko so·ani somaio bakko ra·angtokaha.
Salni pringchibara, Srimanta Sankardeva Kalakshetra-oniko Dispur-o donggipa uamangni nokchina Pa Tarun Gogoi-ni manggisiko ra·angaha. Mangko so·chakram biapona ra·angna skangba, Pa Gogoi-ni manggisiko Rukmini Gaon-ni Gilja nokchina, Ambari-ni Burha Jame Masjid-china aro Uzanbazar-ni Ugratara Temple-china ra·angchengaha.
A·dokni dingtang dingtang biaprangoni aro salgro-salaram a·jol gimikoni manderang mija Mongolbar attamoni Butbar salona Pa Gogoi-ni manggisiko dongipa Srimanta Kalakshetra-o skotong minister gitchamko mande ra·angtokaha.
Assam-ni Health minister Pa Himanta Biswa Sarma, jean skango Pa Gogoi sagini namen jakkaltogipa mande saksa ong·achim, uan Gogoi-ni manggisiko so·ani pilak kamrangkon nirokataha.
