Shillong, July 20: Assam a·doko Cattle Preservation Bill 2021-ko ra·gatanichi Meghalaya a·dokoba matchu jile cha·anio aro matchu be·enrangko man·anio neng·nikanirangko man·gen ine Hynniewtrep Youth Council (HYC) parakatenba, iani bidingo ja·kurangko de·samsochina Meghalaya sorkariko didiataha.
Iani bidingo HYC-ni dilgiparang, Meghalaya a·dokni Deputy Chief Minister aro Animal Husbandry & Veterinary Minister Prestone Tynsong-ko grongenba, memorandum-ko on·angaha.
Deputy Chief Minister-na sedoatgipa chittio HYC-ni parakatani gitade, ia Cattle Preservation Bill-ni Section 7-ara Indian Constitution-ko pe·ani gita ong·enga maina ‘Inter State Trade & Commerce’-ara Indian Constitution-ni Seventh Schedule-ni ning·o on·gipa Union List-ni List 42-o ga·aka aro inter-state trade & commerce ba a·dokrangni gisepo bading chiwalgrikaniko Indian Parliament-ni pass ka·gimin niamrangna agrede a·songo darang a·dokrangan champengna gita bilrang dongjachim.
“Ia Bill-o matma salruraanikoba Assam a·doko champengna gita niamko donahani gimin ian Assam a·doko songdongenggipa Hindu-rangna mikkang nitee niamko tariani gitasa ong·enga. Assam a·doko ia niamko ra·gatna on·genchimode mikkangchi gipin cha·ani aro gipin bosturangkoba a·dokona ra·baaniko champengnaba gnang aro Meghalaya a·dokona Assam a·dokan mongsonggipa cholguga gita ong·engani gimin ian mikkangchi Meghalaya a·doko songdongenggipa manderangna bang·a neng·nikanirangko ra·baani cholrang dongenga,” ine HYC-ni president Robertjune Kharjahrin parakataha.
Meghalaya a·doktangon matchurangko chu·onga gita man·jaengani gimin matchurangko Bangladesh aro gipin a·songrangona niam gri badingatna gita nangja ineba HYC parakataha.
Ia Bill-ni Section 7-o Assam a·dok gita gipin a·dokrangona matchu salaniko champengatengani gimin mikkangchi gipin a·dokrangoniko Meghalaya a·dokona matchurangko ra·baanio neng·nikanirangko chagrongna nanggen ineba HYC, jajrengchakenganiko parakataha.
Da·o dipet Meghalaya a·dokona matchurangko West Bengal, Telangana, Uttar Pradesh aro Bihar gita dakgipa a·dokrangonikosa Assam gita salbaengachim ine nikna man·a.
