28.8 C
Tura
spot_img

Assam-o Cong-ni adita sak MLA-rang BJP-o napna miksongenga

Must read

Guwahati, Dec 19: Congress dolni gitcham minister Ajanta Neog baksana Assam-o Congress dolni gipin MLA-rangba BJP dolo napna senge dongtokenga ine Neog-ni Assam chief minister Sarbananda Sonowal-ko grongeani salsa ja·man, BJP dolni dilgipa parakataha.

“Golaghat-ni Congress MLA Ajanta Neog, bakan ching dolona re·bagnok. Unbaksana Congress dolni gipin MLA-rangba ching baksa agangrikenga aro BJP dolo napna skaniko paraktokaha,” ine BJP dolni dilgipa parakataha.

Gitcham PWD minister Ajanta Neog, Bristibar attamo Guwahati-o donggipa an·tangni noko Assam-ni chief minister Sarbananda Sonowal baksa sriksrik gronge golpogrikahachim.
Batanggimin jarangonin Neog-ko BJP dolo napangskanaba gnang ine jangbingbanganirangko knasona man·engahachim.

BJP doloni koborko on·ani gitade, re·baenggipa December-ni 26 tariko Union Home Minister Amit Shah-ni Assam-ona re·baani somoio Neog-ko BJP dolona rimchaksonaba gnang.

“Neog-na agreba, Sarupathar constituency-ni Congress MLA Roselina Tirkey, October jao Congress doloni ra·galgipa Lakhipur-ni MLA Rajdeep Goala aro Congress dolni gipin MLA-rangba ching baksa agangrikenga. Uamangko BJP dolo rimnapani bidingo dolni dilgiparang chanchianggen,” ine BJP dolni dilgipa parakataha.

Indake ong·engon, Neog-ni ong·katanichi Congress dolna maming nangchakeani dongjawa ine Assam Pradesh Congress Committee (APCC)-ni president Ripun Bora, parakatskaaha.

spot_img

More articles

spot_img
-->

Latest article