Sivasagar, Feb 14: Assam a·doko Congress dol sorkariko rikna man·genchimode Assam Accord-ni niam mingantikon chel·chakgen aro maming dakeba Citizenship (Amendment) Act-ko ra·gatjawa ine Robibar salo, Congress dolni dilgipa Rahul Gandhi, ku·rachakaniko on·angaha.
Assam a·doko Assembly election-ko re·baenggipa March-April jani gisepo ong·atna siengani gimin, Congress dolni dilgipa Rahul Gandhi, Robibar salo Assam-ona re·bae manderangna aganprakengon, Assam a·doko songdongenggipa manderangni nangnikanirangko knachakgipa ‘chief minister’-kosa Assam a·doko nangenga ine Gandhi parakangaha.
“Assam a·doko Assam Accord-sa tom·tomaniko ra·baaha aro a·doko chel·chakenggipaba ong·a. Anga aro angni dol, ia Assam Accord-ni niam mingantikon chel·chakgen,” ine Gandhi aganaha.
BJP aro RSS dolrang, Assam a·dokko bak dakna jotton ka·enga ine janapatengon, “Assam a·dok bak ong·ahaode Prime Minister Narendra Modi ba Union Home Minister Amit Shah-de nangchakeaniko man·jawa indiba Assam-ni manderang aro India a·songsa nangchakeaniko man·gen,” ine Rahul Gandhi aganaha.
Assam a·dokni Chief Minister Sarbananda Sonowal-ko matnange aganangengon, Assam a·doko songdongenggipa manderangni neng·nikanirangko knachake namatna kam ka·gipa ‘chief minister’-kosa Assam-o nangenga ine Congress-ni dilgipa aganaha.
Assam a·dokni cha baganrango kam ka·enggipa manderangni man·gnirangko bariatna ku·rachakaniko on·angengon, “Gujarat-ni cha baganrango kam ka·giparangde cha baganrangkosa man·enga indiba Assam-de kam ka·giparang salo gong 167 hajirakosan man·skaenga. Assam-ni cha baganrango kam ka·giparangna chinga salo gong 365/- hajirako on·na ku·rachakenga,” ine Gandhi aganaha.
Assam a·dokni gitcham chief minister Tarun Gogoi-ni somoio Congress sorkari, Assam a·doko so·sojengjeng ong·anirangko namate tom·tomaniko ra·bapilna man·ahachim ineba Gandhi parakataha.
