Guwahati, May 29: Robibar walo, Assam a·dokni skotong Guwahati songjinmao gari a·sel ong·anichi, Assam Engineering College-o poraienggipa saksni chatro chatrirang so·otako man·aha.
Gari a·sel ong·anio so·otako man·gipa saksni chatro chatrirangara, Dibrugarh-oni Imon Baruah, Sivasagar-oni Kaushik Mohan, Guwahati-oni Arindam Bhuwal, Guwahati-oni Niyor Deka, Nagaon-oni Upangshu Sarma, Majuli-oni Rajkiran Bhuyan aro Mangaldoi-oni Kaushik Baruah ong·a.
Police-rangni kobor on·ani gitade, Robibar walo chatrorangoni saksa Scorpio gariko chu peke salenba, Guwahati songjinmani Jalukbari flyover sambao Bolero pick-up truck baksa chatinggrike a·sel ong·aha aro ia a·sel ong·anio Scorpio gario gadoenggipa sak 10 chatro chatrirangoni saksnide a·sel ong·gipa biapon sikamaha aro gipinrangkode bakan Guwahati Medical College & Hospital-ona ra·angaha.
