Guwahati, Oct 26: Assam-o ‘Miya Museum’-ko kulina dakchake on•gipa manderangni gimin Chief Minister Himanta Biswa Sarma-ni sing•doatani ja•man, ia museum-ko Goalpara-ni district administration chipe donataha aro ja•mano, Assam-ni police-rang, Asom Miyan Parishad-ni president Mohor Ali aro sakgipin dilgipako iani bidingo rim•aha.
Ali aro Abdul Baten-ko police-rang, Lakhipur-oniko rim•enba, sing•sandina gita Goalpara Sadar police station-ona rim•baaha.
Ia bilsini April ja dipetan Assam-ni police-rang, Al Qaeda baksa bak ong•enggipa Ansarullah Bangla Team (ABT) bobil dolo jak donggipa sak 40 manderangko rim•na man•ahachim.
Sorkarini chipe donatgipa ‘Miya Museum’-ko re•anggipa Robibar salosan, Assam-ni Goalpara a•jao donggipa Dapkarbhita jolo nokdonggaahachim.
Assam a•dokni Chief Minister Himanta Biswa Sarma-ni parakatani gitade, ia ‘Miya Museum’-ko kulina gita tangka paisarangko dakchake on•gipa dol aro manderangko police-rang sandirokangkugen aro jak donggipa manderangni kosako nanga gita ja•kurangko de•anggen.
Indake ong•engon, Assam a•dokni BJP MLA-rang aro BJP-ni gipin dilgiparangba, Muslim-rangni daka rikanirangko mesokna donenggipa museum-rangko pe•galchina gita Assam sorkariko didiangaha.
